Shillong, Rymphang 20 : Ka Sorkar Jylla kala rai ban ai jingkyrshan iha ki artylli ki Autonomous District Council-GHADC bad JHADC kiba don hapdeng ka jingtyrkhong pisa, kaba lam sha ka jingbym lah siew hok ia ka tulok jong ki nongtrei la katto katne snem mynta.
Haba iakren bad ki nongthoh khubor hynne ka sngi Ba-ar, u Symbud Myntri Rangbah ka Jylla ba khmih ia ka Tnad District Council Affairs (DCA) Bah Prestone Tynsong ula ong ba ka Sorkar ka kloi ban kyrshan ia ka GHADC bad JHADC na ka jingtyrkhong pisa.
Kine ki artylli ki District Council kim shym la lah ban siew tulop ia ki nongtrei. Ka GHADC marwei ka khlem lah ban siew tulop ia ki nongtrei mynta la lai snem.
“Ngi la pyrshang ban leh eiei na ka liang ka Sorkar. Nga la dep iakren bad u Myntri Rangbah bad u Myntri Rangbah un sa kren (halr kane ka rai) ha kane ka Dorbar Mang Tyngka ba mynta” ong u Bah Prestone.
La ki artylli ki ADC ki ioh ia ki bhah khajna na ki marpoh khyndew, u Symbud Myntri Rangbah ula ong “Kine ki dei ki kam kiba dang pyniaid bad kam dei eh ba ha man ba kut u snem mang tyngka, phi hap ban siew pynkhuid ia ki. Ka shong ha ka jingioh lum bad hadien ka jingkhate bad ka jingpynbiang hangne hangtai, yn sa pyllait ia ka pisa sha ki District Council”.
