Shillong, Rymphang 27 : U Symbud Myntri Rangbah ba khmih ia ka kam Pohiing (Police) Bah Prestone Tynsong ula pynpaw ba ka Sorkar ka long kaba kloi ban pynlong ia ka jingiakren iasuk bad ka Hynniewtrep National Liberation Council (HNLC) hynrei ka jingkitkhlieh ka shong ha kane ka seng ban shim ia ka sienjam.
“Ka jingkhang sha ka jingiakren iasuk ka dang plie-la ka dei na ka Sorkar India lane dei na ka Sorkar Jylla. Ka rai hi ka shong ha ki. Lada ki rai, ngin pynsdang biang ia ka jingiakren hynrei lada kim rai, ngim lah ban ong eiei ia kata” ong u Bah Prestone hadien ka jingwan pyndem u Area Commander ka HNLC ha Mairang.
U Bah Prestone ula kyntu ia kiwei ki dkhot ka HNLC ba kin bud ia ki sienjam u Area Commander bad ban wan im lang noh ha ka imlang sahlang.
“Ka jingkyntu jong nga sha kiwei ki dkhot ka long ba kin bud ia kajuh ka dienjat bad wan noh sha ka imlang sahlang” ula ong.
Haba kren halor ki daw ka jingwan pyndem, u Bah Prestone ula ong “Ki don bun ki daw..haba kut hi, namar ka jinglong samla, phi pyrkhat bha bad ong “ Nga hap ban wan phai noh sha ka imlang sahlang”.
U Symbud Myntri Rangbah ula kular ruh ban ai jingiada bad ka jingkyrshan ia kito kiba wan ban pyndem wait.
“Ngi don hangne, ka Sorkar ka don hangne ban iarap ia phi….shisien ba phi la wanphai, phin ioh ia ka jingiada ba pura” ong u Bah Prestone haba ban jur ia ka jingthmu hok jong ka Sorkar ban pynshlur ia ki dkhot ka HNLC ba kin wan phai noh sha ka imlang sahlang.
La kin dang don ki ban wan pyndem, u Bah Prestone ula ong “Ngam lah ban ong eiei halor kata” haba kyntait ruh ban kynthoh eiei halor ka jingkhlain bor ka HNLC da kaba ong ba ia ki jingtip ba bniah lah ban ioh na Police Headquarter.
