Shillong, Naitung 31 : Ka Hynniewtrep National Youth Front (HNYF) ha ka sngi Nyngkong kala pynpaw ba ka long kaba kloi ban iarap ia baroh kito, kiba ioh pdiang ia ka shithi dawa pisa ha ka kyrteng jong ka seng Hynniewtrep National Liberation Council (HNLC).
“Ngi kyrpad ia baroh kito, kiba la ioh pdiang ia ka shithi dawa pisa ha ka kyrteng ka HNLC, ba kin wan sha ka Ophis jong ka HNLC naba ngi long kiba kloi ban iarap ia ki bad ym tang ban leit sha ki lad pathai khubor khlem da pynpaw satia shaphang jong kin aba ka long kaba eh ia ngi ban pynshisha” ong u Bah Bless Dkhar President ka HNYF East Khasi Hills haba iakren bad ki nongthoh khubor.
Kane ka jingkren jong u kala mih tang shisngi hadien ba kawei ka Nongkhaii Kynthei kala phah ia ka shithi sha u lyngba ka email sha kawei ka kot khubor Khasi ba pyntip ba kala shah dawa pisa T.20 lak da uwei u briew ba kyrteng u Synshar Khymdeit, uba kam ialade kum u nonglum pisa ka HNLC ha East Khasi Hills bad Ri-Bhoi.
U Bah Bless ula ong ba ula kyndit ban iohi ia ka shithi bala phah sha u da kawei ka briew ka bym ithuh, kaba la shu pyntip ba ka dei ka nong Mawlai bad ba kala dep siew ruh ia ka pisa sha u Khyndeit namar ka jingtieng.
Ula ong ba ka HNLC dang shen kala ai jingpynshai ba kam donkti satia ha kaban phah ia ki shithi dawa pisa namar ba kala don ha ka jingiakren iasuk hapdeng ka Sorkar Pdeng, ka Sorkar Jylla bad ka kynhun.
Une u Nongialam ka HNYF ula suba jur ia ka jingdonkti ki Langiong ha lyndet kane ka jingphah shithi dawa pisa da kaba pyndonkam ia ka kyrteng ka HNLC kum ka jingpyrshang ban pyndkut ia ka jingiakren iasuk. Hynrei ula ong ba ka HNYF kala kut jigmut ban shimkhia bha ia kane ka kam.
“Ha kajuh ka por, ngi phah ia ka jingmaham kaba tyngeh ia u Synshar Khymdeit bad ngin sa wad ruh ban tip u dei uei. Ngi kyrpad ruh ia ki briew ba kin wan shakhmat namar ka HNYF ka long kaba kloi ban ai ka jingiarap kat kaba ka lah ia ki halor ka kyndon ba kin wan iakynduh markhmat” ula ong.
“Ngi phah ruh ia ka jingmaham kaba tyngeh pyrshah ia baroh kito kiba pyrshang ban pyndonkam bakla ia ka kyrteng jong ka HNLC” ula bynrap.
Une u Nongialam ka HNYF ula kyntu ruh ia ki nongshah dawa pisa ba kin leit ujor da ka ejahar sha ki Pulit ban pynthikna ba kum kine ki riew bymman kin ngat ha ka jingpynsajia.
Pule ruh: Dawa ka UHM ia ka Sorkar ban shimkhia ia jingsniew ka surok NH-6 na Soomer sha Malidor
 ha ka sngi Nyngkong kala pynpaw ba ka long kaba kloi ban iarap ia baroh kito, kiba ioh pdiang ia ka shithi dawa pisa ha ka kyrteng jong ka seng Hynniewtrep National Liberation Council (HNLC).){kind=link}