Shillong, Nohprah 06 : Ka Hynniewtrep National Liberation Council (HNLC) ha ka sngi Thohdieng, kala pynpaw ia ka jinglong ba kloi ban sangeh ia ka jingialeh da kaba kieng atiar (political armed struggle) lada ki paidbah ki jied ban iai neh bad ka Ri India bad kyntait ia ka Ri Hynniewtrep kaba laitluid.
Kane ka jingkynthoh kala wan kum ka jubab ia ka jingkynthoh ka Nongialam ka National People’s Party (NPP) bad Myntri Sorkar Kong Ampareen Lyngdoh kaba kynnoh ba ka HNLC ka shu “Kyrhuh tang na Khlaw” hadien ba kane ka seng kala kynnoh ba ka NPP kala kylla long ka atiar ban synshar ki Garo haba buh hakhmat ia lai tylli ki mat jingdawa ba kynthup ia ka rukom treikam ban bujli ia ki Myntri Rangbah ka Jylla ha kaban pynthikna ia ka jingioh nongialam marbiang hapdeng ki Jaidbynriew ka Jylla.
Ha ka shithi paidbah (open letter) bala phah sha ka Kong Ampareen, u General Secretary cum Publicity Secretary ka HNLC Bah Sainkupar Nongtraw ula ong “Lada ki kwah shisha ban ailad ia ki paidbah ka Bri Hynniewtrep ban rai, ngi kop ia phi ban pynlong ia ka jingiathep vote (referendum) lane jingiajied paidbah (pebliscite), kaba iasyriem ia kaei kaba la leh da ka FARC bad ka Sorkar Colombia ha u snem 2016, lane kaei kaba ki paidbah ka Scotland ki leh ha u 2014”.
“Ai b aka pyrthei kan iohi la ki paidbah ka Bri Hynniewtrep ki kyrshan ne em ia ka rukom pyrkhat jong phi lane ia ka jingialeh jong ngi ban synshar dalade Lada ki paidbah ki jied ban iai neh bad ka India bad kyntait ia ka Ri Hynniewtrep kaba laitluid, ngin ieh noh ia ka jingialeh jong ki da kaba kieng atiar bad ngi kwah ban pynlut ia ka por jong ka jingim jong ngi ha phatok” ula ong.
U Bah Sainkular ula niew ruh ia ka jingkynthoh ka Kong Ampareen ba kynnoh ba ka HNLC ka shu “kyrhuh na khlaw” bad khot ia ki ban iashimbynta ha ka elekshon ka Ri India, ba kam dei tang ka jingialam bakla hynrei ka jingbym pdiang ia ki mat ba kongsan kiba ïadei bad ka jinglong trai bad ka hok jong ka jaidbynriew Hynñiewtrep.”
Haba thalain tyngeh ruh ia ka Myntri ba ka kynnun ba ka HNLC ka don ia ka mynsiem sngew iapher jaidynriew bad ba kwah pyniapait iapra, u Bah Sainkupar ula ong “Phi la kynnoh ia ngi ba ngu don ka mynsiem iapher Jaidynriew, da kaba kam ba ngi kwah ban pynkha ia ka jinglong jingman kum ha Manipur. Ban nujor ia ka Hynniewtrep bad Manipur ka long kumba ianujor ia ka miet bad ka sngi. Ngi don iala ka jong ka Jaka ba ai pateng ki kpa tynmen, kaba don ia ka histori bad ka kolshor kaba la suhthied bha. Ki sakhi na ki jingwad bniah ki pyni ba ngi dei kawei na ki Civilization bala rim bha ha Asia. Watla katta, ngim don la ka jong ka Ri, ngi la shah shet kylla ha ki Sorkar kawei hadien kawei, kiba la pynjah burom ia ki Syiem jong ngi bad ym khein snep ia ki jingaiti lut jong ki Khun u Hajar ka Hynniewtrep”.
Ka shithi kala ong ruh “Phi kam ban mihkhmat ia ki paidbah, hynrei na ka kamra thiah ba aram jong phi? Ka jingkam Nongialam jong phi ha Iingdorbar Thaw Ain ka Jylla ka dei kaba kam kai, kumba paw na ki video bala saphriang kiba pyni ba phi iohthiah ha kiba bun ki khep. Ka nongthaw ain ba jaituh bad ba iohthiah lyngngai, phi la shet kylla ia ka jingshaniah bala ai ha phi. Hato kane ka dei ka kam Nongialam?.
U Bah Sainkupar ula kynthoh ruh “Ka Histori kan kynmaw ia phi kum ka dur jong ka jyrsieh tah siah lieh, ka nongthaw ain bala thohbria. Katba kiwei ki ieng ban mad ia ka jingbishar bah ok, phi pat phi kiar, rieh ha ka bor u Conrad Sangma. Phi ieng kum ka Nongialam bamsap, ka nongmihkhmat ba donkti kam bymman kaba pyndonkam ia ka jingiadei bad ki bor sain pyrthei tang kiar na ki jingshisha. Hato dei kane ka nam kaba phi kwah?”.
 ha ka sngi Thohdieng, kala pynpaw ia ka jinglong ba kloi ban sangeh ia ka jingialeh da kaba kieng atiar (political armed struggle) lada ki paidbah ki jied ban iai neh bad ka Ri India bad kyntait ia ka Ri Hynniewtrep kaba laitluid.){kind=link}