Shillong, Jylliew 21 : Ka Indian National Congress (INC) kaba don ha Liang Pyrshah hynne ka sngi Balang kala pynpaw ia ka jinglong ba kloi ban kyrshan ia ka Sorkar Meghalaya Democratic Alliance (MDA) ba ialam da ka National People’s Party (NPP) lada ka Bharatiya Janata Party (BJP) kam iadonlang ha ka kynhun synrop.
U President ka Meghalaya Pradesh Congress Committee (MPCC) Bah Vincent H Pala haba iakren bad ki nongthoh khubor ula ong ba ka Congress kan jin sa kmen palat lada ka lah ban pynkohnguh ia ka NPP ba kan iakhlad lok noh bad ka BJP haba jubab ia ka jingkylli la ka Congress kan kyntu ia ki Nongialam ka NPP ba kin phah mih noh ia ka BJP na ka Sorkar MDA.
“Ngin da kmen palat lada ngi lah ban pynkohnguh (ia ka NPP ba kan iakhlad lok noh bad ka BJP). Khlem ka BJP, ngi long kiba kloi ban kyrshan bad iatreilang bad ka NPP ha Jylla, kam don jingartatien satia ia kane” ong u bah Vincent.
Kane ka jingkynthoh jong u kala mih hadien ba ka Congress kala kyrshan ia ka NPP ban pynkhyllem ia ka Executive Committee ba ialam da ka United Democratic Party (UDP) ha Khasi Hills Autonomous District Council (KHADC) lyngba ka No-Confidence Motion.
Haba kylli halor ka sienjam bala shim pyrshah ia ka Nongialam barim ka CLP Kong Ampareen Lyngdoh bad ki 4 ngut ki MLA barim ka Party namar ka jingkyrshan ia ka Sorkar MDA ba ialam da ka NPP hashuwa ka elekshon 2023, u Bah Pala ula ong ba ka kam ba iadei bad ki 5 ngut ki MLA ka iapher bha bad kane ka kam kaba jia ha KHADC.
“Ngi ioh ia ka jingmynjur n aka party shuwa ban iatreilang ha Council (EC) hynrei (ki 5 ngut ki MLA) kila leit hi dalade ( ban kyrshan ia ka Sorkar MDA)” ula ong bad bynrap “Ha katei ka por ruh, ngim don jingthut ban iatreilang bad ka NPP hynrei dei namar ka jingdonlang ka BJP. Ngi la kren shai ba ngim lah ban iatreilang bad ka BJP”.
Nalor kane, u Bah Pala ula ong ba kam don BJP satia ha KHADC. Kat kum ka jingong jong u, u CEM u dei uba shah jied na ka NPP bad u DyCEM un dei naka Congress ha KHADC. “Namar kata, kano kano ka rai ba kin shim an long beit na ka bynta ka jingbha ka Council” ula ong.
Haba phai pat sha ka Jylla, une u Khliehduh ka MPCC ula ong ba ka Congress kan iai neh ban shong ha ka Liang Pyrshah bad kan iai bteng ban kren ia ki ishu bapher bapher kila ktah ia ka Jylla bad ia u paidbah.
Ula iengskhem ruh ba jin ba don ka BJP ha KHADC, ka Congress kan nym treh satia ban ai jingkyrshan ia ka NPP bad ong “Ngi la krren shai ba ngi kloi ban iatreilang bad no bad no ruh laitnoh ka BJP”.
. Khlem ka BJP, ngi long kiba kloi ban kyrshan bad iatreilang bad ka NPP ha Jylla, kam don jingartatien satia ia kane” ong u bah Vincent.){kind=link}