Shillong, K’Lyngkot 14: U myntri khynnah ka sorkar pdeng ba dei khmih iaka tnat Electronics bad Information Technology u Rajeev Chandrasekhar ula ong ba ka Bharatiya Janata Party (BJP) ka kloi ban pyntip shaka Election Commission of India (ECI) iaki kyrtong kiba la shah pynngat ha ki kam bymman.
“Kane ka hukum jong ka ECI kadei kaba la iaid mynta la bun bun snem ban pynbna paidbah lyngba ki kot khubor ne ki News Channel iaki kyrtong kiba la shah pynngat ha ki kam bymman bad naka liang ka BJP ka bud iaka jingbthah kumba la leh hashuwa ka ilekshon Karnataka, Pondicherry, Gujarat, Uttar Pradesh” la ong u Rajeev.
U Rajeev ula ong ba ka BJP ka wan ha Meghalaya naka bynta ban shakri iaki paidbah kane ka jylla namar ka don iaka thong ban rat dkhong iaka jingsynshar da kawei ka longïng kuma la jia hapoh West Bengal.
Ula ong ba ka shong ha ki paidbah ban shim iaka rai ban pynthikna ba ka jylla kan ioh ka sorkar ka ban wanrah ka jingshai naka bynta ki nong shong shnong hynrei kawei ka shai ka BJP kadei hi ka party ka ban wanrah ki kam pynroi naka bynta ka bha ka miat ki paidbah.
“Ngam lah ban tip ia kaei ka ban jia hynrei ngi donkam ban trei shitom naka bynta ban ioh ka jingkyrshan bad ka jingiatreilang bad ki paidbah ka jylla” ula ong.
U Rajeev ula ong ba ka BJP ha ka jingialam u myntri rangbahduh ka ri u Narendra Modi kan tei iaka lawei jong ka Meghalaya kham bha ban ia kiwei ki Party kiba la don palat 50 snem hapoh kane ka jylla.
“La kadei ka Party ba synshar da kawei ka ïng, ne ka Party ba dang wan thymmai kum na ka jylla West Bengal, ka BJP ka sngew ba ka lah ban shakri kham bha iaki paidbah ka Meghalaya bad ia kane donkam iaki paidbah ban shaniah haka BJP” ula ong.
