Shillong, Lber 05 : U President ka Congress bad MP barim ka Shillong Bah Vincent H Pala ula pyntip ba ka Congress kam pat kah iakren satia ia ka elekshon MP shiteng samoi ha Shillong Lok Sabha kat bym pat dap shibnai hadien ka jingiap noh u MP Dr Ricky AJ Syngkon.
Une u Nongialam ka Congress ula pynrem ruh ia ka Voice of the People Party (VPP) ba kala khohreh ban jied kyrtong thymmai tang hapoh 12-15 sngi ba khlad une u Nongialam bad MP lajong.
“Ki bahaiing hasem jong u (Dr Ricky) ki dang iasngewsih, dang bun bah ki briew ki dang ialeit sngew lem sha ka iingsah jong ki” ong u Bah Pala haba pynpaw “Ngam pat sngewdei ban iakren politics ha kane ka por”.
Ula pynpaw ba ka dang iaid dang 12-15 sngi naduh ba khlad noh u Dr Ricky.
“Nga kwah ban iakren ia kane ka kam hapoh ka party, bad ngim pat shim rai satia” ong u Bah Pala uba dang don ha lynti na Tura sha Shillong.
U Bah Pala ula ong ba ka Congress kan ap la kumno kumno shibnai eiei hashuwa ba kan jer ia ka kyrteng u kyrtong, haba pynpaw hi ba ka party ia mynta kam pat iakren eiei ia kane ka kam.
Haba kylli, une u President ka Congress ula kynthoh ba ka Voice of the People Party (VPP) kala klet ia ka jingsngewsih da kaba kren kloi palat halor ka elekshon MP shiteng samoi mar syn khlad u Dr Ricky.
“Nga sngew ba ka VPP ka klet ba u dang khlad mynta dang hapdeng 12-15 sngi. Ban iakren politics, nga sngew shimet ba ka dang kloi palat. Ngam tip kumnp ka VPP kala shim rai kloi bha” ula kynthoh.
Ka VPP kala pynbna ia ka kyrteng jong u nongaiktien Dr Batskhem Myrboh kum u kyrtong ban aireng ha ka elekshon MP shiteng ban wan ha Shillong Lok Sabha constituency.
