Shillong, Naitung 07: Ka Khasi Students’ Union, Mawlai Circle ha ka sngi Saitjaiñ, kala leit kitbok kitrwiang ia u Samla Manbhahkupar Malngiang u ban leit kilan met sha Srinagar ban iashimbynta ha ka U-17 South Asian Football Federation (SAFF) Men Championship kaban long ha Ri Thailand.
Ka KSU Mawlai Circle hapoh ka jingialam jong u Samla Badon Malngiang, Sport Secretary, kala kitbok kitrwiang ia u Samla Manbhahkupar Malngiang bad ai mynsiem ia u ba un ialehkai bha.
Katkum ka kyrwoh na u samla Mac Donald Jitem u Asst. General Secretary ka KSU Mawlai Circle ula pyntip ba ka Seng ka dap da ka jingkmen ban iohi ba napdeng ka thup ki 31 ngut kiban ioh leit pyntbit ialade na ka bynta ka jingpynkhreh ia katei ka lympung iakhun, 2 ngut ki samla Khasi ki lah rung hapoh ka thup jong kitei ki 31 ngut ki nongialehkai.
Ula ong, ba kane ka Seng ka sngewdei eh ban kitbok une u Samla ba un nang iai trei shitom bad kumjuh ban iai kiew shakhmat ha ka sap kaba u don ha ka jingialehkai Football.
