Shillong, Rymphang 24: Ka Meghalaya Energy Corporation Limited (MeECL) ka don ia ka jingshah ram kaba kot T.2015.75 Klur ha kaba 72% na ka, ym shim la shah ban kynthup ha ka bai bording na ki paitbah.
Haba jubab ia ka Cut Motion hapoh ka iingdorbar, u Myntri ka tnad Bording Bah Metbah Lyngdoh ula ong, “Ka MeECL haduh mynta ka sngi ka don ia ka ram kaba dei ban siew kaba kot T.2015.75 Klur. Ki ram kiba iadei bad ka Bond jongka MeECL ka long T.630 Klur, ka ram na ka PFC Atmanirbhar ka long T.423.55 Klur bad ka ram na ka REC Atmanirbhar ka kot T.393.34 Klur ki dei ki bym shim la shah ban kynthup lang ha ka bai bording na ki paitbah. Ka jingkot ka pisa baroh jong ka jingshim ram ka kynthup ia ka 72% jong ka ram kaba dang sah jong ka Corporation.”
U Bah Lyngdoh ula pynpaw ba ka Corporation kala bteng ban mad ia ka jingduhnong ha u snem 2022-23 bad 2023-24.
“Nyngkong eh, ka jingdawa ia ka bording elektrik ha Meghalaya ka long kaba ia pher bad na kiwei pat ha ka ri India, ka jingdawa ka jur bha ha ki bnai Tlang. Ka jingiatehkular ka MePDCL bad kiwei pat ki jylla kadei kaba lah iapynbeit ha ka jingpynphai mar kylliang ia ka bording hi bad kam shim la don kano kano ka jingioh da ka pisa ka tyngka ia ka jylla” ula ong.
“Ka Baar, kila don ki jingeh halor ki kyndon kiba la ktah ia ka rukom pyniaid iaka pisa jong ka, namar ba ia ka dor ne Tarrif kaba la shah da ka Regulatory Commission kam long kaba la iahap bad ka jingpynlut bad kala don ka jingshah kyntait na ki bor kiba dei khmih” la ong u Bah Lyngdoh bad ka pynpaw ia ki jingeh kiba mad da ka Corporation.
Ula pynshai ruh halor ki sienjam kiba la shim da ka Meghalaya Power Distribution Corporation Limited (MePDCL) ban shimkhia ia ka jingeh ha kaba iadei bad ka pisa ka tyngka, haba jubab hapoh ka iingdorbar thawain.
“Na u Risaw 2023, ka MePDCL kala pynsangeh ia ka jingai kylliang ne ka jingkhaii ia ka jingpynlang ia ka bording bad kala shim da ka lad ban khaii haba ka don byllai bad kyrhai ka bording sha ki iew ban pynmih pisa bad ban pynduna ia ka jingpynlut ha ka jingthied ia ka bording na ka bynta ki paitbah kiba pyndonkam ia ka bording” la ong u Bah Lyngdoh.
Ka Corporation kala siew ruh ha ka por kaba biang ia ki jingsiew ha ka jingthied ia ka bording ban kiar na ka jingpynslem ha kaban siew tam ia ka jingsiew ne Surcharges.
Ka MePDCL kala seisoh ha kaban pynkohnguh ia ka Regulator ban shimkhia ia ka bai bording na ka bynta u snem mang tyngka jong u 2024-25, kaba la lam sha ka jingpynduna ia ka jingduhnong kaba kot T.35 Klur.
“Ki jingseisoh na kitei ki jingpyrshang na ka jingshisha ba ha u Snem Mang Tyngka jong u 2024-25 ka jinghduhnong kala hiar sha T.35 Klur. Ha u snem 2025-26 ngi long kiba skhem jingmut ba kane ka rukom treikam kan iai bteng” ong u Bah Lyngdoh.
U Myntri ula pynpaw ruh halor ki jingeh kiba la sahteng kaba kynthup ia ka jingpynslem ha kaban khyllie ia ka jingduhnong da ka DISCOM namar ka jingbym don ia ka Operational Funding Requirement, ha kaba jingdonkam ia ka pisa kala kynjoh T.1165 Klur hapoh jongka UDAY MOU.
“Kine ki mat kidei kiba lah dep ban pynbeit” ula ong bad ka pan ia ka jingiarap ban iai bteng ban kyrshan ia ka MeECL.
 ka don ia ka jingshah ram kaba kot T.2015.75 Klur ha kaba 72% na ka, ym shim la shah ban kynthup ha ka bai bording na ki paitbah.){kind=link}