Shillong, Rymphang 24 : U Symbud Myntri Rangbah ka Jylla Bah Prestone Tynsong ula pyntip ia ka Iingdorbar Thaw Ain ba ka mang pisa ban jingtei thymmai ia ka Tara Ghar Guest House la pynthymmai biang na ka T.15 klur sha ka T.24.91 klur hadien ba ka dor u Contractor ka poi 12.38% palat ia ka schedule.
“Uwei u Contractor ula buh ia ka dor ba 12.38% palat ia ka scheduled of rate. Dei namar kane ba la pynthymmai ia ka mang pisa” ong u Bah Prestone haba jubab ia ka cut motion bala wanrah da u Nongialam ka Liang Pyrshah Mukul Sangma ha Iingdorbar Thaw Ain.
U iathuh ba ka pisa bynrap ba T.12.89 klur kan kynthup ia ki jingshna ia ki tiar ki tar ban pyndait bad buh hapoh.
U Bah Prestone ula bynrap ba ka Tara Ghar Guest House kan dei ka jingtei ba thymmai, kaba ki nongwan kai kin itynnad ia ka la kum ka five-star hotel.
“Kan dei kawei na ki Guest House ka Jylla ba biang tam nadong hadong hapoh ka Ri…kan dei ka sien ba nyngkong kaba ngin don ia ka State Guest House kaba iahap kum ka five star”.
U iathuh ba ki Ophisar ka Sorkar Pdeng bala shongthait bad ki briew ba wan nabar ri kila iaroh ia kane ka jingtei, haba bynrap ba ka Sorkar kan thmu ban tei ha kajuh ka rukom ia ki jingtei ki ban sa mih thymmai.
Haba u Mukul u kylli la ka don ka jingpyrshang ban pynhiar ia ka dor jingtei khnang ban tyngkai ia ka pisa, u Bah Prestone ula kyntait ia ka jingkam ba ka jingtei thymmai iaka tara Ghar ka dei kaba la pyn shongdor palat, haba pynpaw ba ka Sorkar kala pyntreikam ia ka schedule of rate naduh u snem 2021-22.
U iathuh ba kane ka Guest House ka don haduh 18 tylli ki kamra kynthup hynriew tylli ki VVIP suites.
“Nga kyrpad ia ki dkhot ba kin leit rungkai…ka nam jong ka Meghalaya kala nang kiew namar kane ka Guest House” ula bynrap.
