Shillong, Jymmang 26 : Ka National People’s Party (NPP) kala ioh ia ka jingkyrshan kaba khlem poi pyrkhat ha Jowai ha ka miet sngi Nyngkong da ka jingwan kyrshan u radbah ka Voice of the People Party (VPP) Bah Snarbor Laloo ia u kyrtong ka NPP Dr DRL Nonglait na ka bynta ka elekshon shiteng samoi ka Shillong Lok Sabha.
U Bah Laloo ula an iashimbynta ha ka jingialang ialap elekshon jong ka NPP ba long ha Chilliangraij Dorbar Hall ban pynpaw ia ka jingkyrshan ia u Dr Nonglait bad ki nongialam ka NPP kila la pdiang burom ia u.
Kane ka jingwan kyrshan kala pynkyndit bha ia u MLA ka Jowai Bah Wailadmiki Shylla jong ka NPP.
Haba kren ha ka jingialang, u Bah Wailad ula ong “Nga shym la khmih lynti ia kane, hynrei ngi la nang khlain nang khlain katba kane ka jingialap elekshon ka dang iaid. Nga ai khublei ia u Dr Nonglait namar ka jingmynjur ban iakhun kum u kyrtong ka NPP”.
“Kumta nga ong mynta, phi la pyni ia ka jingkhlain jong phi…Ngi khlem khmih lynti ba u Bah Snarbor un wan bad kyrshan ia phi kum u kyrtong ka NPP. Kane ka long kaei kaei kaba kyrpang” ula bynrap.
U Bah Wailad ula ong ba kane ka jingjia ka long ka “dak kaba bha” ia ka NPP hashuwa jong ka elekshon shiteng samoi.
“Ki paidbah na kylleng ka ri-lum Khasi bad Jaintia kila wan shakhmat ban kyrshan ia ka NPP bad ia u kyrtong jong ngi namar u ioh ia ka jingngeit bad jingshaniah jong u paidbah” ula ong.
Ula ai nam ia ki jingpyrshang jong u Dr Nonglait ha baroh ki snem bala leit ban ioh jingithuh ia ka ktien Khasi kum ka Official Language ka Jylla.
“Ngi dei ban ai khublei ia u. Kum u President ka KAS, bad khlem da bat ia kano kano ka kam ha ka sain pyrthei, ula pynthikna ba ka ktien Khasi ka ioh jingithuh kum ka Official Language. Kum u MP, yn sa lah ban tynruh ha kaban pynrung pat ia ka hapoh ka khyrnit ba phra jong ka Riti Synshar ka Ri”.
Haba pdiang ia ka jingwan kyrshan u Bah Snarbor, u Dr Nonglait ula ong “Ngam pat ju iakynduh ia u lane iakren bad u lyngba ka phone. Nga la shu iohi ia u Madiah ha YouTube. Mynta ka sngi nga ioh ban iakynduh markhmat ia u”.
U Dr Nonglait ula bynrap ba ka jingwan kyrshan u Bah Snarbor ka long kaba ai mynsiem bha. “ka aimynsiem ia nga ban iohi ia ka sur rangbah, uba kren na ka bynta ka bha ka miat bad ka roi ka par jong ka thain, ban ieng ryngkat bad ngi” ula ong.
Ka jingialang kala dap snam da ki nongkyrshan kiba la iatuid sha kane ka hall.
 kala ioh ia ka jingkyrshan kaba khlem poi pyrkhat ha Jowai ha ka miet sngi Nyngkong da ka jingwan kyrshan u radbah ka Voice of the People Party (VPP) Bah Snarbor Laloo ia u kyrtong ka NPP Dr DRL Nonglait na ka bynta ka elekshon shiteng samoi ka Shillong Lok Sabha.){kind=link}