Shillong, Jymmang 29: Ka jingwankai ba dang shen jong u klur ialehkai cricket Sachin Tendulkar bad ka jingjia hiar thma ki lehnoh ia ki nongshangkai pyrthei ha Pahalgam, kala pynkiew ia ki kam jngohkai ha Meghalaya ha kaba ki hotel, homestay bad ki resort ia mynta kila dap lut smam.
“Hadien ka jingjia ha Pahalgam, kiba bun ki briew kila phaikhmat noh sha ka thain Shatei Lam Mihngi ka Ri bad haba phi iakren ia ka thain Shatei Lam Mihngi ka India, ka jaka ba khring eh ka dei ka Meghalaya” ong u Bah Alan West Kharkongor, President ka Meghalaya Rural Tourism Forum (MRTF) ha ka sngi Palei.
Haba kren halor ka jingktah jong ka jingwan iuhkjat u Tendulkar, u Bah Alan ula ong “Ka jingjia ha Pahalgam kala pynshlur ia bun kibriew ban jied ia ka Jylla jong ngi bad hooid, ka jingwan u Sachin Tendulkar kala don ka jingktah kaba khraw. Kum u khlur ialehkai, u don bun ki nongbud. Nga sngew ba ka jingwan jong u kala pynkylla ia u kum u kynja brand ambassador ka Meghalaya bad ka jingwan jong u kala nang pynshlur shuh shuh ia ki briew ban wan shane”.
U Bah Alan ula tip bha shaphang ka thain Sohra kum u nongshongshnong ka Sohra, ula ong ba ka jingwan ki nongshangkai kala nang kiew nang kiew ha Sohra. “Kala nang kiew nangkiew na uwei u snem sha uwei pat. Mynshemsnem, ki jingkhein ki pyni ba ngi pdiang ia kumba 16 lak ngut ki nongshangkai bad mynta u snem, la khmih lynti ba kan nang kiew sa shi lak lane ar lak. Ta ka daw ngi donkam ban pynkhreh bha ialade ban pynthikna ia ka jingshngain jong ki nongwankai” ula ong.
Ka jingnang paw ka Meghalaya kum ka jaka kaba shngain bad ba don ia ka mariang kaba khring, ka pyni ia ka jinglong kongsan ban pynkhlain ia ki jingtei bad ki jingshakri ban lah pynbit pynbiang ia ka jingdonkam ki nongwan shangkai.
