Shillong, Nailur 11 : U Myntri Rangbah ka Jylla Conrad K Sangma ha ka sngi Palei, ula ong ba ki project ba bei tyngka na shabar ne externally aided project (EAP) ha Meghalaya kala kiew sha ka T. 11,324 klur ha kine ki 7 snem bala leit.
“Ka jingpyntrei baroh lang ia ki EAP bapher bapher kala iaid bha bad wat u soh ruh u long uba bha bad dei namar kane kaba lam sha ka jingkiew jong ka EAP na ka song pisa ba T.1300 klur ha u 2018 sha ka T.11,324 klur mynta, kaba long haduh 10 shah ka jingkiew ha kine ki 7 snem bala leit. Kane ka dei ka sakhi ia ka jingshisha b aka Sorkar kala lah ban pyntreikam bha ia ki EAP” ong u Conrad haba jubab ha ka kynta kylli jingkylli hapoh Iingdorbar.
Ula pynshai ba ki project EAP ki kynthup ia 72 % kum ka grant, kaban siew pynphai da ka Sorkar India bad 28% kan dei ka synniang na ki Sorkar Jylla.
Ula ong ba ka jingpyntrei ia ki EAP ka long kaba shaibha, bad baroh ki jingtip lah ban ioh na ka website jong ka Meghalaya Basin Development Authority (MBDA) bad ka Meghalaya Basin Management Agency (MBMA).
Kat kum ka jingong jong u, ka Sorkar kala iakren bad baroh ki kynhun ba don bynta, kynthup ki MLA, ban pynthikna ba ki project kin ai jingmyntoi ia ki paidbah jong ka Jylla.
U Myntri Rangbah ula ai jingmut ruh ban wanrahlang noh ia ka skhim MLA bad SRWP bad ka MBMA khnang ban ioh kheit ia u soh uba kham bha.
Ka Sorkar kan sa wanrah shen ia ka kaiphod MBMA ha Iingdorbar, ka ban pyni ia ka jingmut shisha jong ka Sorkar ban wanrah ia ka jingtreikam kaba shai bad ba khuid ba suba.
Kat kum ka jingong jong u, ka Sorkar ka thmu ban wad ruh ia ki lad ki lynti ban wanrah lang hajuh ia ki skhim bapher bapher bad ki project ban kham pyniohnong shuh shuh ia ki paidbah ka Jylla Meghalaya.
U Myntri Rangbah ula pan ruh ia ka jingai jingmut na u Nongialam ka Liang Pyrshah bad kiwei kiwei ki kynhun ban nang lah pynjanai ha ka jingpyntreikam ia ki externally aided project.
 ha Meghalaya kala kiew sha ka T. 11,324 klur ha kine ki 7 snem bala leit.){kind=link}