Shillong, Lber 02 : Ka Voice of the People’s Party (VPP) hynne ka sngi palei, kala pynpaw ba kam long satia kaba kloi ban iatreilang bad ka National People’s Party (NPP) ban iathaw Sorkar halor ka nongrim baka don shibun palat ka jingkynnoh bamsap pyrshah ia kane ka party ha kine ki san snem bala leit noh.
Kane ka seng sain pyrthei ba thymmai, kala pynpaw ia ka jingkwah ban ioh ia ka Sorkar kaba ialam da ki seng riewlum hapoh ka Jylla.
Hadien ba shah jied biang na Nongkrem kum u MLA, u President ka VPP Bah Ardent M Basaiawmoit haba iakren bad ki nongthoh khubor ula ong ba ka jingkylli ban iakren bad ka NPP ha kaban thaw Sorkar kam mih satia namar ka party jong u kam don jingkwah satia ban iatreilang bad ka.
Ka VPP kala ioh ia ka jingjop haduh 4 ngut ki MLA na ka 59 ngut sha ka Iingdorbar Thaw Ain ka Jylla.
Haba kylli ia ki daw halor ka jingpyrshah ia ka NPP, une u Nongialam ka VPP ula ong ba ki jingkynnoh bamsap pyrshah ia ka NPP kala jur bha ha kine ki san snem bala leit noh haba ka ialam ia ka sorkar Meghalaya Democratic Alliance (MDA).
“Kumno phi khmih lynti ia ngi ban iatreilang bad kum kane ka party kaba don shibun ki jingkynnoh bamsap bad kam shym la don satia ka jingtohkit ia kine ki jingkynnoh kiba pynhun ia ki paidbah ka Jylla” ong u Bah Ardent.
Haba pynpaw ban sa thaw ia ka sorkar synrop hapoh ka Jylla, u Bah Ardent ula ong “Ngin sa peit kiei ki kynhun kiba donkam ia ka jingkyrshan jong ngi bad ngi ruh ngi la pynkhreh ia ki katto katne ki kyndon ba kin buh hakhmat jong kino kino ki party kiba kwah ban iatreilang bad ka VPP”.
“Lada don ka lynti, ka thong jong ngi ka long ban ioh ia ka Sorkar ka ban ialam da ki seng riewlum” ula ban.
Une u MLA ka Nongkrem ula ong la ka VPP ka shong ha ka Liang Pyrshah ne ha ka Sorkar ia mynta hi ym pat lah ban ong “hynrei kam pher ha kano ka liang ngi shong namar ngin iai bteng ban ieng skhem hala ki jong ki nongrim”.
Halor ka jingkynnoh ba ka VPP ka dei kaba la bei tyngka da ka All India Trinamool Congress (AITC), u Bah Ardent ula ong “Kane ka dei tang ka jingkynnoh elekshon kaba mih n aka buit jakhlia jong ki party kiba la suhthied hapoh ka Jylla”.
Ula ong ba ka VPP ka dei ka party ka bym lah wat tang ban pynbiang ia ki lama shala ki jong ki nongkyrshan.
Kat kum ka jingong jong u, ka jingkyrshan jong ki paidbah ia ka VPP tang ha ka por ba lyngkot ka pyni shai ba kila kwah har har ia ka jingkylla hapoh ka Jylla.
Haba phai sha ka elekshon ha Sohiong, kaba la pynjlan namar ka jingkhlad noh u Myntri kam Pohiing bad kyrtong ka UDP Bah HDR Lyngdoh, u Bah Ardent ula ong ba ka party kan sa peit ia ki rule lada ki shah ban sei ia u kyrtong.
U MLA ka VPP na North Shillong Bah Adelbert Nongrum ula ong ba ka Party kala ioh 4 seat namar ba ki paidbah kila iohi ia ka jingtreikam jong ka NPP ha kine ki san snem bala leit noh.
“Ki paidbah kila kwah ia ka jingkylla bad ka VPP ka dei kaba biang eh ia ki paidbah ban ai jingkyrmen” ula bynrap.
