Shillong, Naitung 23: Da ki spah ngut ki riew paidbah naduh ki heprit, ki samal pule bad ki longkmie, longkpa ki la ia lum ha ka jingiakhih kaba jai jai ha Laitumkhrah, Shillong ban pynpaw ia ka jingiasnohkti lang bad ki samla pule kiba dang iakhih ha Jantar Mantar New Delhi ban pyrshah ia ka jinglait tuid ki kot jingkylli eksamin NEET.
La pynlong kum “ka jingïalang jong ki paidbah, na ka bynta ki paidbah”, ki nongïashim bynta ki la rah ïa ki placard kiba thoh “Baroh ki khmat ki phai sha Jantar Mantar”, “Phi donkam ban hiar shuki noh”, “Ka India jong ngi ka tuid ka snam ha ki surok”, “Ngi ïohi ïa phi, ngi ieng ryngkat bad phi”, “Pyrkhat katba dang dei ka aiñ”, bad “Lada phi don kano kano ka jingeh, ka Sorkar ka don hangne ban pynjynjar shuh shuh”.
Ki paidbah kiba don haka jingiakhih ki la ong ba ka jingthmu ka long ban pyni ba ki ieng ryngkat bad ki samla pule ha Delhi daka ba kynnoh ba kine ki samla pule ki la shah shoh bad shah siat bom pynsat khmat ha ki pulit.
“Ki samla pule kim dei ki lehnoh. Ki pyndonkam ia ka hok jong ka jingsynshar paidbah ban kylli jingkylli ia ka Sorkar” la ong uwei u nongiashim bynta haka jingiakhih.
“Ka jingshah shoh jong ki, ka jingshah pyndonkam daki bom sat khmat, kane kam dei ka rukom haka synshar paidbah. Ngi don hangne ban ïathuh ïa ki samla pule ha Delhi ba kim don marwei, ngi ruh ngi don bad ki”.
Kawei pat ka nongiakhih kaba la wan ryngkat bad ka kmie bad kiba ha iing ha sem jong ka, ka la ong ba ki dang kynmaw ruh ia ki samla pule kiba la shim iala ka jingim hadien ba lait tuh ki kot jingkylli eksamin NEET.
“Ngi don hangne na ka bynta jong ki bad na ka bynta ki bahaïing hasem jong ki” ka la ong.
“Ka India kadei ka ri kaba bun tam ki samla pule, ngi don iaka hok ban dawa. Ka tied daki lathi kala wanrah ka jingmynsaw ia bun ngut ki samla pule bad ki dang shah sumar ha hospital. Nga kyrmen ba kin ioh iaka hok jong ki”.
Ki nongïakhih ki la dawa naka Sorkar ban shim iaka jingkitkhlieh halor ka jinglait tuh ki kot jingkylli eksamin NEET bad ki la kyntu ba dei ban ailad ïa ki samla pule ban ïakhih khlem da tieng naka jingshah thombor haki bor ka ain”.
