Kut ka jingrakhe dap 50 snem ka MBoSE hapdeng ka iphuh iphieng
Tura, Risaw 19: U Myntri Rangbah ka Jylla Conrad K Sangma hynne ka sngi Palei ula ong ba ki samla ki dei ki spahbah jong ka Jylla bad ka Sorkar kala kut jingmut ban pynthikna ba kan iarap sei pyrthei kat kaba lah ia ka sap jong ki samla.
“Ka dei ka kamram jong ngi kum ka Sorkar ban pynthikna ba ngin buh hapdeng eh ia ki samla ha kano kano ka kam ba ngi leh na ka bynta ka Jylla….don ki khep ba ka Sorkar ka pynleit jingmut palat sha ka synshar khadar ban sam skhim. Ka Sorkar sam skhim hi ka dei ka lynti kaba khim ban iakhmih namar haba phi peit ia ki skhim, phi kwah tang ban pyntrei ia ki…bad phin ym sngewthuh ia ka jingmut jong ka jingpyntreikam ia ki skhim. Hynrei, ngi la buh mynta ia ki samla hakhmat eh jong ki bad sa shim iaka rai” ula ong.
U Myntri Rangbah ka Jylla ula kren ia kane ka kyntien ha ka jingialang pynhap pyrda ia ka jingrakhe dap 50 snem ne jubili ksiar jong ka Meghalaya Board of School Education (MBoSE) ba long hynne ka sngi ha Tura.
“Ka dei ka kamram jong baroh ki kynhun kiba don bynta ban leh iala ka bynta ha kaban pynthikna ia ka jingsain dur bad ialam lynti ia manla ki samla ba kin long kiba lah ban tei, kut jingmut, ieid ri, long adkar bad ki nongshongshnong kiba tieng ia u Blei” ula ong.
Kane ka jingrakhe ba ai sngi jong ka MBoSE kaba la kut hynne ka dei kaba la wan iashimbynta ruh da u Myntri ka Tnad Pule Puthi Rakkam A Sangma, u Chief Secretary ka Jylla DP Wahlang napeng kiwei pat ki kynrem ki lyndan bad ki Ophisar ka Jylla.
“Ka Meghalaya ka dei ka Jylla kaba rit haba nujor bad kiwei pat ki Jylla hapoh ka Ri kum ka Uttar Pradesh..kumta, khnang ba ka Jylla kan poi ha kliar jong ka jingjop bad ka roi ka par, ngi hap ban pynthikna ba ngin lah pynmih ia ki nongshongshnong kiba shemphang khnang ba kin lah ban noh synniang sha ka roi ka par jong ka Jylla” ong u Conrad haba pynpaw ia ka thong jong ka Jylla ban long kawei napdeng ki 10 tylli ki Jylla ba hakhieh duh hapoh ka Ri.
U Myntri Rangbah ula air uh ka jingithuh ia ka synniang jong ki nongiakhun jylla bad ki nongialam, kiba wat hapdeng shibun ki jingeh, kila lah ban pynwandur ha kaban sdang ia ka MBoSE ha u snem 1973, mynba ka Jylla ka dang shu kha da ka jingphiah na ka Assam.
“Nga kwah ban ai burom ia baroh ki nongialam jong ngi kiba la aiti shibun eh ha kaban shim ia ki rai kiba wanrah jingkylla wat hapdeng ki jingeh bad ki jingduna ba bun ha katei ka por, ban pynlong ia ka MBoSE ban kot haduh une u mawmer” ula ong.
Kiwei pat kiba la ai jingkren ki kynthup ia u Myntri ka tnad Pule Puthi Rakkam A Sangma, u Chief Secretary ka Jylla DP Wahlang bad kiwei kiwei.
U Bah Wahlang haba ai jingkren, ula ong ba ka jingdon ki briew bala nang pule ba thoh (literacy rate) ha Jylla kala kiew n aka 24.49% sha ka 80% haduh mynta da ka jingnang bun ki jaka pule n aka 40-50 tylli sha ka 2923 tyll kiba la iasoh bad ka MBoSE ha kaba 1816 ki dei ki skul Secondary bad 421 ki dei ki Higher Secondary School.
