Agartala, Naiwieng 22 :U Myntri Rangbah (CM) barim ka Tripura u Manik Sarkar ula kam ba ka jingkren jong u CM ba mynta u Dr Manik Saha halor ka jinglong jingman ha ka jylla da shisha ka long ban aijingiada ia ki runar bad ka ban pynsngew shngain ia ki ba kin bteng ban leh ia ki kam thombor ia ki kynhun liang pyrshah.
U Sarkar uba dei ruh u nongialam ka liang pyrshah ka CPIM ula pynpaw ia kane hadien ba ula iakynduh ia ki arngut ki nongtrei jong ka party CPIM kiba la ngat ha ki jingmynsaw na ka jingshah thombor ha ki kynhun runar ha ka 20 tarik mynta u bnai bad ia kiba la kynnoh ruh ba ki dei kiba la aijingkyrshan da ka seng BJP.
“Ka CPIM ka dang thmu ban pynlong ia ka rally paidbah ha ka jaka iew ha Camper ha kaba ki nongtrei jong ka ki dang leit ban pan jingbit na ki bor pulit hynrei ia kaba kila kyntait ban pdiang.Hynrei hadien ba kumba 20 ngut ki nongtrei ka party kim shym la ioh jingtip bad katba ki dang wanphai sha la iing, haduh kumba 40 ngut ki runar ia kiba la ngeit ba kidei kiba la aijingkyrshan da ka BJP kila wan mih kynsan bad thombor naphang ia ki nongtrei ka party jong ngi,” ong u Sarkar.
Nalor kata u Sarkar ula ong ruh ba kine ki kynhun runar kila pyndonkam da ki nar rod bad ki dieng ban thombor naphang ia ki nongtrei jong ka party CPIM ha kaba don ruh katto katne na ki, kiba phong da ki helmet bad kiba kah iala ki jong ki durkhmat khnang ban ym don kiban ithuh ia ki.
“Haba Nga kylli ia kine ki lanot ia kiba la pynkit shapoh GB Pant hospital ha kaba iadei bad kitei ki runar, kila iathuh ba kine ki runar kila wan hadien ba kila kah iala ki jong ki durkhamt da ki jain.Kane ka dei kata ka jingsynshar bakhuid jong ka sorkar synrop IPFT ba la ialam da ka BJP.U CM ka jylla uba bat ruh ia ka tnat kam pohiing ula pyntip sha ki lad pathai khubor ba ka jinglong jingman ha Tripura ka long kaba iaid beit iaid ryntih.Kane ka dei ka nuksa jong ka jingbha? Nga pynrem jur ia kiba kum kitei ki jingjia bad ki bor pulit ki dei ban thwet ia ki runar bad ban kem ia ki mardor,” ong shuh shuh u Manik Sarkar.
Shuh shuh utei u CM barim ula kam ruh ba u sngew ba kine ki kynhun runar kila ioh ka jingpynshlur hadien ka jingai jingkren jong u CM ba mynta ha kaba iadei bad ka jinglong jingman ha ka jylla.
“Ki runar ki sngew shngain bad ioh mynsiem hadien ba u CM ka jylla ula pyrshang ban iada ia ki da kaba ong ka jinglong jingman ha ka jylla ka long kaba iaid beit iaid ryntih.Kane kam long kaba bha.Ngim shym la khmih lynti ia kaba kum kane na une u nongialam ka jylla,” ong shuh shuh u Sarkar.
