Shillong, Nohprah 15 : U Chief Electoral Officer (CEO) ka Jylla Bah FR Kharkongor ula ong ba ki Political Party ka Jylla ne ki Nationa Party kin hap ai jingkhein ia ka jingpynlut pynsep ha ka por elekshon ym ha ka Ophis jong u ha Jylla.
“La iai ban ba tang ka jingkhein ia ka bailut baisep jong ki kyrtong shimet la aiti ha ka Ophis u CEO” ong u Bah Kharkongor ha ka kyrwoh ba pynmih hynne ka sngi palei.
Kane kala mih shisngi hadien ba u Nongaiktien ka AITC Saket Gokhale ula kyrpad ia ka Iingkashari Meghalaya High Court ba kan tuklar lem halor ka jingkynnoh ba ka National People’s Party (NPP) ba synshar ha Jylla, kam shym la lah ban ai ia ka jingkhein hapoh ka 75 sngi jong ka elekshon MLA 2018.
U Gokhale ha ka mudui, ula kynnoh ba ka jingbym leh eiei jong ka Election Commission ka India (ECI) bad u Chief Electoral Officer (CEO), Meghalaya pyrshah ia ka NPP ka dei ka jingiaid lait ia ka Ain.
Haba pynpaw ba ka NPP ka dei ka State Party bala ioh jingithuh ha u 2018, u CEO ula ong “Namar kata, kala paw shai ba kane ka kam ka hap palat ia ka bor jong ka Ophis u CEO”.
U Bah Kharkongor u pyntip ruh ba iaka RTI bala pan da u nongpan (Gokhale) ha ka 14/9/22, la dep ban phah da ka Ophis u CEO sha ki bor ba halor ha ka 22 tarik Nailur 2022.
“La ioh jingtip ba kat kum ki kot ki sla, ka ECI kala shimkhia ia kane bad dep ruh ban jubab sha u nongpan RTI lyngba ka shithi ba 3 tarik Risaw,2022. Nalor kata, ka ECI lyngba ka shithi ba 21 tarik Naiwieng, 2022, kala ailad ruh ia une u nongpan RTI ban mudui sha u First Appellate Authority hapoh ka 30 sngi ba ioh pdiang ia kane ka shithi, lada une u nongpan RTI um pat hun ia ki jingtip bala ai” ula ong.
Ha kajuh ka por, u CEO ula ong ba ka Ophis jong u kan iai bteng ban shimkhia ha kaban pynlong ia ka elekshon kaba khuid ba suba bad ka bym don ka jingshah liang iano iano ruh.
Ula ong ba ki jingkynnoh baroh ki paw kum ka jingkwah pynkulmar jingmut, ka jingthew bakla bad jingialam bakla.
