Shillong Naitung 02: U Myntri ka Pule Puthi ka jylla u Rakkam A Sangma ula ong ba ka jingmang ia ki 21 tylli ki People’s College ha kylleng jong ka jylla kala iarap ban pynduna ia ka jingkitkhia ha kaban ai jaka pule ne Admission ha ki jaka pule kiba don ha ka nongbah Shillong.
Katkum ka jingong jong u Rakkam Sangma, ka People’s Colleges kala saphriang ha kylleng ki district jong ka jylla, kumta kala pyniar ia ki jaka pule ha ki kyrdan kiba heh bad kala pynduna iaka jingkhia jong ki college ha Shillong.
U Myntri ula ai burom ia kane ka jingjop jong kane ka sienjam ia ka jingialam ba tbit jong u Myntri Rangbah ka jylla.
Haba kylli la ka sorkar ka don jingthmu ban pynbun shuh shuh ia ki People’s Colleges, u Sangma ula ong, ba kila don bun bha ki jingtyrwa kaba kila iohpdiang hynrei kim pat shim ia kano kano ka rai haduh mynta.
Ula banjur ba hapdeng jongka jingpyniar ia ka jingpule ha ka kyrdan kaba heh ka long pat kaba kongsan bad ka kyrdan jong ka jingai ia ka jinghikai ym dei ban iapeiñ noh. Ka sorkar ka dang treikam halor kane ka bynta bad u Myntri ula pynthikna ba kino kino ki college kiba thymmai kin hap ban pyndep ia ki jingdonkam kiba kongsan.
U Rakkam A Sangma ula pynbna ruh ba ki kam ki jam na ka bynta ban thungkam ia ki nonghikai ha ki Lower Primary School kadei kaba lah jan dep.
“Nga dang khmih bniah ia kane ka mat man la ka por. Ka Baghmara, South Garo Hills district kala dep ban ai ia ka jingpynbna paidbah mynta la 6 bnai tam halor ki kam kiba lait, katba ka jingpynkhreh ia ka ‘Roster’ ha kiwei pat ki district ka dang iaid shakhmat” ula ong.
Ula pynpaw ruh ia ka jingkhmih lynti ban sa pynmih ia ki jingpynbna paidbah na ka bynta ka kam nonghikai ha baroh ki district hapoh jong ka shi taiew bad ula banjur ba ka jingslem kadei namar ba kala don ka jingeh ha ka lain ‘Technical’ hynrei u dang trei pat ban pynsted noh ia ki kam ki jam ban pynthikna ba ki skul kin ym shah ieh khlem ki nonghikai.
U Rakkam ula iathuh ruh ba ki don palat 600 tylli ki kam kiba lait ha ki Government Lower Primary School bad 150-200 tylli ki kam kiba lait ha ki Higher Secondary School.
Nalor kane ula iathuh ruh ba ka sorkar kala shimkhia ban kyntiew kyrdan noh ia ki Secondary School sha ki Higher Secondary Schools bad mynta u snem yn kyntiew kyrdan ia 30 tylli ki skul.
Ula iathuh ruh halor ka jingsdang ia ka Evening Section ne ka jingpule ha ka por janmiet ha Kiang Nangbah ban ai jingshakri namar ka jingkiew jong ki khynnah kiba la pass ha ka SSLC.
