Shillong, Naiwieng 23 : Ka Dr Mehtab Chandee A Sangma, ka MLA ba thymmai na Gambegre, kala pynpaw ba ka jingjop jong ka ia ka elekshon shiteng samoi ka dei namar ba ki paidbah kane ka constituency, kila jied ia ka jingkylla bad ka roi ka par.
Kane ka kurim u Myntri Rangbah ka Jylla Conrad K Sangma, kala ong ba ki paidbah kila donkam palat ia ka roi ka par bad ka jingkylla ha ka constituency.
“Ka khubor kala sawa jam bad shai bha bad ki paidbah kila jied ia ka jingkylla mynta bad ki paidbah kila jied ia ka roi ka par. Kane ka dei kaei kaba ka part, ki nongialam kila pynshlur bad kine ki dei kiba ngi la ieng ialap bad nga tharai ka khubor kala shai” ong ka Dr Mehtab hadien ba ka jop ia ka elekshon da 4594 vote.
Kala pynpaw ba ka National People’s Party (NPP) kam pat ju jop na kane ka constituency, kumta kane ka jingjop ka dei ka dak kaba shai ba ki paidbah ka Gambegre kila jied ia ka jingkylla”.
“Nga tharai ba ka Ri-lum Garo baroh kawei bad ka Meghalaya kila mad ia kane mynta bad ka NPP ha ka Sorkar bad (ngi) kan dang pyrshang katba lah ban pynthikna ban gin ai ia ka jingshakri kaba paka tam sha ki paidbah” ula ban jur.
Ha kajuh ka por, u National President ka NPP bad Myntri Rangbah ka Jylla Conrad K Sangma, ula ong ba ka party ka kmen shibun bad ai khublei ia ki paidbah ka Gambegre halor ka jingkyrshan jong ki. Haba pynsngew ia kajuh ka sur kum ka kurim, ula ong ba ki paidbah kila jied ia ka roi ka par.
“Ngi la kmen palat kum ka party bad ngi kwah ban ai khublei ia ki paidbah ka Gambegre halor ka jingkyrshan jong ki ha kane ka elekshon shiteng samoi. Ka long kaba sngew myllung ban iohi ba ki paidbah kila jied ia ka roi ka par bad ngi kwah ban pynthikna ia ki paidbah ka Gambegre ba ngin leh kat kaba don ka bor ban pynthikna ban gin lah ban pynurlong ia ki jingkular. Ki don shibun ki jingtynjuh hynrei ngin hap ban pyrshang kat kaba lah ban shakri ia ki paidbah ka Gambegre” ula ong.
Ula ai khublei ruh ia ki Nongialam,ki nongtrei ka party, ki MLA, MDC jong ka party kila la trei shitom ban kyrshan ia ka jinglong kyrtong ka Dr Mehtab Chandee A Sangma.
Ka Dr Mehtab Chandee kala jop da 4594 vote ia ka kyrtong ba wan ba-ar ka Sadhiarani M Sangma jong ka AITC.
