Shillong, Nov 14: U Myntri Rangbah ka jylla u Conrad K Sangma ula pynpaw ia ka jingthmu kaba iar na ka bynta ban kyntiew iaka jingshakri lyngba ki liengsuin ka ban wanrah ia ka jingkylla ha ka jingim kaba man la ka sngi, naduh ka jingwan pynpoi ia ki dawai dashin haduh ban pynbiang ia ki jingdonkam baroh ha ki jaka nongkyndong.
“Ka don ka lad kaba khraw lyngba ka kam pynher liengsuin ban wanrah ia ka jingkylla ha ki shnong ki thaw” ula ong haba ban jur ia ka jingdonkam ban ai iaka jingkyrshan bad ia ka jingtrei ia ki kam kiba thymmai. U Conrad K Sangma ula kren ia kane haba plie ia ka 6th Helicopter & Small Aircraft Summit 2024 kaba la long hynne ka sngi Palei ha Shillong.
Ia katei ka jingialang la pynlong da ka Pawan Hans Ltd bad FICCI, ryngkat ka jingkyrshan jong ka Ministry of Civil Aviation bad ka Sorkar Meghalaya, bad ka jingthmu ka long ban pyniar ia ka jingshakri jong ki Helicopter bad ki liengsuin kiba rit ban pyniasoh ha kylleng ka ri India.
Haba ai jingkren u Conrad Sangma ula pynpaw iaka jingsngewnguh ia ka Ministry of Civil Aviation halor ka jingjied ia ka nongbah Shillong kum ka jaka ban pynlong ia katei ka Summit, kaba long ka jingialang kaba nyngkong kum katei ha ka thain shatei lam mihngi jong ka ri India.
Ula banjur ba ka jinglong jingman na ka jingdon ki jaka lum ka long kaba bit ba biang bha na ka bynta ki liengsuin kiba rit bad ki Helicopter ban leit ban wan, kaba long kongsan ban kyntiew ia ki kam kiba iadei bad ka ioh ka kot.
Haba pynpaw ïa ki jingeh jong ki lad pynïasoh ha ka jylla Meghalaya bad ka thaiñ shatei lammihngi, u Myntri Rangbah ka Jylla ula pynsngew ba ka long kaba kongsan ia ka leit ka wan da ki liengsuiñ ban ïarap ïa ka jylla ha kaban pynurlong ïa ki thong kiba ka don ban kyntiew ia ka roi ka par bad ia ka ioh ka kot bad ula kyntu ia kiba wan iashimbynta ba kin pyrkhat ba ia ka jingpyniaosh kam dei ban long tang hapoh ka ri hynrei ka jingpyniaosh ka dei ruh ban long bad ki ri kiba don ha Sepngi jongka dewbah Asia.
“Ka jingleit da ka liengsuiñ na Shillong sha Dhaka kan shim por tang hapoh jong ka 30 minit, katba ka liengsuiñ ban leit sha Bangkok kan shim por tang kumba 1 kynta 15 minit eiei,” la batai u Conrad bad ka ong, “Ka jingjan jong ngi bad ka sepngi jong ka dewbah Asia kum ka Vietnam, Laos, Cambodia bad Bhutan ka pynlong ia ngi ban khamjan ban ia ka New Delhi bad ka pynpaw ia ka lad kaba lah ban kyntiew lyngba ki kam jngohkai pyrthei, ki jingshakri ha ka liang ka koit ka khiah, ka khaii pateng bad ban pynbiang ia ki jingdonkam ha baroh kawei ka Act East Zone.”
U Conrad Sangma ula kren ruh ha kaba iadei bad ka thong jong ka jylla ha kaba iadei bad ka kam liengsuin, ha kaba ka sorkar kala trei shitom ban kyntiew ia ka kam jngohkai pyrthei, ka khaii pateng, ka koit ka khiah, bad kiwei kiwei ki bynta kiba kongsan ha ka jylla bad ula pynshlur ia baroh kiba donbynta ban iatreilang naka bynta ban khring shuh shuh ia ki jngohkai.
Ha kane ka summit la wan ban iashimbynta da kiba donbynta ha ka kam, kiba kynthup ia kiban pyniaid ia ka kam pynher liengsuin, kiba shna ia ki tiar ki tar liengsuin, kiba pynbit pynbiang ia ki liengsuin, ki nongkhmih nongpeit, ki kompani kiba bei tyngka bad ki nongmihkhmat na ka sorkar jylla ha kaba baroh kila pynleit jingmut na ka bynta ban pyniaid shakhmat ia ka jingangnud jong ka thain.
