Shillong Jylliew 10: U Myntri ka Sorkar Pdeng ba khmih ia ka Ports, Shipping & Waterways Sarbananda Sonowal ha ka sngi Baar ula ong, ka kam jngohkai kala kylla long kum u paia jong ka roi ka par ha Meghalaya hapoh jongka sorkar kaba la ialam da u Myntri Rangbahduh ka ri u Narendra Modi.
Haba iakren bad ki nongpathai khubor, u Sonowal ula ong, “Ka Shillong kadei ka nongbah kaba itynnad bha, ka Meghalaya kadei ka jingai sngewbha jong ka mei mariang. Ngi dei ban rakhe ia ka da ka jinglong kaba khuid bad ban pynthikna ba ka jingpynneh ia ka roi ka par da kaba shim ruh ia ki lad ban kyntiew ha kaba iadei bad ka kam jngohkai”.
“Ka jingkiew ka kam jngohkai ha ka jylla ka long ka dak kaba bha ba kumno ka Meghalaya kala kylla long ka jaka pdeng na ka bynta ki nongjngohkai kiba napoh ka ri bad bad kiba nabar ri” ula bynrap.
Haba pynpaw ba ka Meghalaya kadei ka nuksa kaba bha jong ka jingjop jong ka scheme Swadesh Darshan, u Sonowal ula ong “Ka sorkar u Modi kala bhah T.244 Klur ban kyntiew ia ka kam jngohkai kaba la lam ruh sha ka jingkyntiew ia ki jaka jngohkai kum ka Umium Lake, Sohpetbneng, Krang Suri Falls, Siju Caves bad Nokrek Reserve kum ki jaka jngohkai kiba biang kyrdan ha ka pyrthei. Naduh ki kshaid sha ka Meghalayan Age Cave Experience, ka jingpynleit jingmut ha ka kam jngohkai kaban neh bad kaban kyntiew ia ka ioh ka kot ha ki shnong ki thaw bad ban thaw ia ki lad aikam aijam”.
“Ki jaka kiba iadei bad ka niam bad ki jaka kiba don naduh ki por kiba rim bajah kum ka shnong Nartiang bad Mawphlang kidei kiba la sdang ban kyntiew ia ka Meghalaya kum ka jaka jngohkai hapoh ka thain shatei lam mihngi jong ka ri India” ula ong.
Haba kren halor ka jingiarap bei tyngka iaka Meghalaya, u Myntri Sorkar ula ong “Ka Meghalaya kala ioh ia ka jingkyrshan pisa kaba kiew sha ka 105 percent na ka sorkar pdeng bad la sakhi ia ka jingkiew ha kaba iadei bad ki jingtei bad ki kam ba iadei bad ka bha ka miat ki nongshongshnong”.
Ula iathuh ba ki kam kiba kongsan ki kynthup ia ka T.22,864 Klur Greenfield High-Speed Corridor hapdeng ka Mawlyngkhung & Panchgram, ia kaba la khmih lynti ba kan pynbha ia ka leit ka wan. La dep ban tei palat 540 km ia ka surokbah National Highways bad ia ki Urban Mobility Project ha New Shillong bad ha Tura la sdang ban pyntreikam hapoh jongka PM-DevINE.”
Ki kam kiba la tuklar ha kaba iadei bad ka bha ka miat kum ka post-matric scholarships ia palat 76,000 ngut ki SC/ST/OBC ki samla pule, T.2,331 klur la sam lyngba ka MUDRA loan bad ka jingpynkiew laishah ha ka jingbhah tyngka ia ka National Health Mission (NHM) kaba la pynkupbor ia ki shnong ki thaw ha kylleng ka Meghalaya, ula ong bad ka bynrap ba kine ki mawjam ki pyni ia ka sorkar u Modi kaba don ia ka jingkitkhlieh ban kyntiew ia ka roi ka par, ka ioh ka kot bad kiwei kiwei.
