Shillong, Jylliew 20 : Ka Myntri Pla Tyngka ka Ri Nirmala Sitharaman ha ka sngi Saitjain kala ong ba ki Jylla ki hap bam pynkhlain ia ka bor treikam bad ka jinglah ban pyntreikam iaki project khnang ba kan ioh jingmyntoi pura na ki Externally Aided Project, bad ban shim ba ka jingkyrshan ki consultancy kadei tang ka lad ba shipor.
Haba kren sha ki lad pathai khubor hadien ba wan ka seminar ba arsngi halor ka phang “Leveraging Externally Aided Project in the North East”, ka Sitharam kala buh jingkylli ia ka jingshaniah jong ki Jylla ha ki consultant ban pyntreikam ia ki EAP.
“Haba phi dei ban ioh ia ki jingmyntoi na kum kine ki prokram, phi donkam ia ka jinglah ban pyntreikam bha hapoh kaJylla. Ki Jyllaki lah ba don, ki Jylla ki lah ban nym don ia ka bor ban lah pyntreikam bad ter ter “ ong ka Myntri.
Ka ong ba ia kane ka workshop lapynwandur ban iakrap ia ki Jylla ba kin pynkhlain ia ka jinglah jongki ban thong ia ki project bad ban pyntreikam ia ki hapoh ka por bala buh khlem da ktah ia ka jingtrei bha ia ki kam. “ Mynta da kane ka workship ba ngi la pynlong, ngi lapyrshang ba ong ba dei ban pynkhlain ia ka jinglah treikam ki institution la ka long ha kaban thong ia ki project lane ban ioh ia ki project, hadien ba ioh, kumno ban pyntreikam ia ki hapoh ka por bala buh bad khlem da iapein ia ka jingtreikam bha” ong ka Sitharaman.
Ka Myntri kala bynrap ba katba ki bor ka Sorkar Jylla ki dei kiba la biang, ka Jylla ka lah ban pyniaid hi dalade ia ki kam. Ha ki kam ba don jingduna, ka jingpan jingiarap nabar ka lah ban pun pyrnon ia kane ka jingduna ba shipor.
U Myntri Rangbah Conrad K Sangma, uba la ai jingkren ha ka jingialang, ula pynpaw ba haduh 90% na ki consultant ba pyntrei ia ki EAP ha Jylla ki dei ki trai shnong kiba la ioh jinghikai kat kum ka rukom treikam ka pyrthei.
