Nongstoin, Nailar 13: Ka Nehru Yuva Kendra Sangathan kaba hap hapoh jong ka Ministry of Youth Affairs & Sports, jong ka Sorkar India, ha ka sngi saitjaiñ kala pynlong ia ka District Level ‘Yuva Utsav’, halor ka phang ‘PANCH PRAN’ ha Khatsawphra College, Mairang, ha kaba bun ngut ki khynnah samla pule napoh ki skul bad kolej kiba don napoh jong ka District, kila ia shim bynta ha kane ka prokram.
Ka ‘PANCH PRAN’ ka don san tylli ki thong kiba kongsan bad kita ki long, ka thong ban pynroi ia ka Ri India, ban weng noh ia ka jingmut jingpyrkhat jong ka jingsynshar phareng, ban sngew sarong iala ka jong ka nongkynti kaba la hiar pateng, ka jingialong shitylli bad ka jingiatreilang bad ban pyndep la ka kamram kum ki nongshong shnong ka Ri India.
U Additional Deputy Commissioner ka Eastern West Khasi Hills District u Bah A.Nongbri ula plie ia kane ka prokram kum u Kongsan ha kaba la iadonlang ka Dr. L.R. Hynniewta, BDO Mairang C&RD Block Mairang, u Bah D.Rapsang, Officer In-charge NYKS Nongstoin, u Bah Boldness L.Nongum Principal ka Khad Sawphra College, Mairang, ki nongtrei sorkar na ki tnad ki bapher bapher, ki nonghikai skul, kolej bad kiwei kiwei.
U Bah A.Nongbri, ula ai ka jingiaroh ia ka NYK kaba la pynlong ia kane ka prokram na ka bynta ka jingmyntoi jong ki khynnah samla ka dong bad ka thaiñ hi baroh kawei.
U la kyntu jur ia ki khynnah samla jong ka thaiñ, ba kin iashimbynta man ka por, ha kino kino ki prokram kiba la pynlong da ka NYK ne da kiwei pat ki tnad sorkar, khnang ba ia ki sap ki phong jong ki, yn ithuh bad sakhi ym tang hapoh District hynrei wat shaduh ka jylla, ka ri bad ka pyrthei hi baroh kawei.
Shuh shuh, u la ong ba ki samla kim dei ban buhrieh ia ka sap ka phong jong ki, hynrei kidei ban pyndonkam janai ia kita ki sap ki phong ba ki don, khnang ba kan long kum ka lad iohkam iohjam ha ka jingim ka jong ki.
Ula ong ba ki samla kim dei ban buh ia ki jingeh ba kin long ki dieng pyngkiang ha ka jingim ka jong ki, hynrei kidei ban trei shitom minot thop khnang kin ioh kheit ia u soh jong ka jingjop bad ka ong, ba ki samla kidei ban stad bad shemphang ha ka rukom pyrkhat pyrdain ha kane ka juk ba ki bor teknolgy kila jyllei bha bad kidei ban pyndonkam ia ki kor technology na ka bynta ka jingmyntoi ha ka pule ka puthi ka jong ki.
Ka jingiakop pynisap ka long ha ki san bynta kata, ka Young Artists talent Hunt (Dro Jingdro), Young Writers Talent Hunt (Thoh Poetry), Photography Talent Hunt, Declamation Talent Hunt and Cultural Festivals (Ka Jingiathong da ka Kynhun) ha kaba ki nongjop napoh ka District Level kin leit ia shim bynta sha ka State level.
U Bah D. Rapsang, Officer Incharge NYKS Nongstoin, u la ai ka jingkren plie bad la pynkut ia kane ka prokram ha kane ka sngi, da ka jingkren ai khublei na u Bah Goldios Sohshang.
