Nongpoh, Naitung 31 : Ka Synjuk Ki Rangbah Shnong ka Ri-Bhoi, kala kyntu ia ki Dorbar Shnong ka District khamtam ia ki shnong ba don ha khappud ka Assam, ba kin long kiba peit pyrman bha hala ki ki shnong ki thaw ban nym ailad ia ka jingwan rung tuh ki mynder ri kiba shah kyndang na Jylla Assam.
“Ngi kyntu ia baroh ki Dorbar Shnong khamtam kiba ha khappud ka Assam, ba kin peit pyrman bha ia ka jingwan rung ki mynder kiba shah beh na Assam khnang ba kin nym ioh jaka rieh ha ka shnong ka thaw” ong ka kyrwoh ka SKRSRB bala pynmih da u Chairman Bah BB Makdoh bad u Secretary Bah PB Sylliang.
Kine ki nongialam ka synjuk kila kyntu ruh ia ki nongialam shnong ba kin shimkhia bha ia kane ka kam.
Kat kum ka jingong u Bah BP Sylliang, ka synjuk ka iohi ba hadien ka jingkyndang ka Assam ia ki mynder ri napoh ka Jylla, kiba bun kila pyrshang ban wan rung sha Jylla Meghalaya.
Ha kajuh ka por, une u nongialam ka synjuk ula kyntu ia ka Sorkar jylla kaba don ia ka bor ban tehlakam ia kane ka jing wan rung ki mynder ri na Assam, ba kan nang pynkhlain ha ka jingbuh ia ki briew kiba pahara hapoh ka Infiltration Check Gate kaba don ha Byrnihat.
Ula ong, kumba iohi mynta, ka jingdon ki nongtrei ha ka Infiltration Gate ka long kaba duna bha ban talasi ia ki briew bad ki kali kiba wan rung shapoh ka Jylla Meghalaya.
