Agartala, Risaw 03 :U Myntri Rangbah (CM) ka Tripura u Manik Saha ula ong ba kila don haduh kumba 400 tylli ki jingjia shah leh beijot bala rejistar ha Tripura naduh u bnai Kyllalyngkot 2020, bad 1,174 ngut ki briew kiba la shah kem namar ki kam pyntriem bapher bapher pyrshah ia ki kynthei, kata kynthup halor ki jingjia shah leh beijot, ong ka kaiphot bala wanrah dang shen hapoh ka iingdorbar assembly ka jylla.
Ka Tripura kala pynlong ia ka jingialang dorbar kaba khatduh mynta u bnai.Kane ka dorbar kaba la kut noh ha ka sngi Nyngkong bala lah ha kaba la iohi ia ka kaiphot jong ka tnat kam pohiing halor ki kam pyntriem bapher bapher, ha kaba la ong ruhba nadpoh ki 2,164 tylli ki kam pyntriem pyrshah ia ki kynthei la rejistar ha kine ki 2 snem shiteng, ha kaba kila don haduh 381 tylli ki jingjia shah leh beijot ha kaba 26 tylli ki dei ki jingshah leh beijot da ka kynhun.
Ia kane ka kaiphot la wanrah hapoh ka iingdorbar assembly da u CM ka jylla u Dr Manik Saha uba khmih ruh ia ka tnat kam pohiing shi bynta ban jubab ia ka jingkylli ba la wanrah da u MLA ka Congress, u Sudip Roy Barman bad u MLA ka CPI(M) u Nirmal Biswas.
Ka kaiphot kala ong ruh ba kila don hynniew ngut ki kynthei kiba la shah pyniap hadien ba kila shah leh beijot ha kaba kum katei ka por.
Haba jubab ia kawei pat ka jingkylli ba la wanwan da u MLA ka CPI(M) u Sudhan Das bad u Nirmal Biswas, u Saha ula ong ba kila don 67 ngut ki briew kiba la shah pyniap ha ki 63 tylli ki jingjia ha kine ki hynniew bnai ba la dep, kata naduh ka 1 tarik u Kyllalyngkot haduh ka 31 tarik u Nailar ba la dep.Kine ki kynthup ia 39 ngut ki shynrang bad 28 ngut ki kynthei.Haduh kumba 114 ngut ki briew kiba la shah kynnoh donkti ha kine ki kam pyntriem kila shah kem bad la pynmih ruh ia ka hukum ban kem pyrshah ia uwei pat u briew uba la jah rngai.Ki pulit kila pynngat ruh ia ki 29 ngut napdeng kine 63 tylli ki case katba ka jingtohkit ia kiwei pat ka dang iai bteng, ong shuh shuh u Saha.
Kawei pat ka kaiphot jong ka tnat kam pohiing kala pynpaw ba haduh 263 ngut ki khynnah kiba dang hapoh rta, 1,050 ki shynrang bad 2,705 ki kynthei kila jah rngai noh na Tripura naduh u bnai Kyllalyngkot 2020 kat haduh u bnai Nailar mynta ka snem.Watla katta ka rekod na ki pulit ka pyni ba la rejistar tang kawei ka case kaba iadei bad ki jingjia khaii briew, kata halor ka jingkynnoh shah khaii jong kawei ka kynthei.
