Shillong, Nailur 16 : U Myntri Rangbah ka Jylla Conrad K Sangma ula ban jur ia ka jingkongsan ban pynbiang tarajur kat kum ki jingangnud jong ki thain, ka jingioh mihkhmat na ki District bad ki jingkular bala khlei sha ki paralok ba iatreilang ha ka jingbujli ia ka Kynhun Myntri ka Sorkar Meghalaya Democratic Alliance-II.
U Conrad ula pynpaw ia kane sha ki lad pathai khubor hadien ka jingialang bam smai ki 8 ngut ki Myntri thymmai jong ka Sorkar MDA-II kaba long hynne ka sngi Ba-ar ha Raj Bhavan.
U Myntri Rangbah ula batai ia ki daw ba don ha lyndet jong ki daw kiba bun ba lam sha ka jing pynkylla ia ka Kynhun Myntri haba buh hakhmat ia ka jingdonkam ban pynbiang tarajur ia ka jingangnud kat kum ki thain, ka jingioh mihkhmat na ki District bad ki jingkular ia ki paralok ba iatreilang.
“Hooid ka dei ka jingpynkylla kaba heh bad la leh ia kane namar ngi don ia u paid bah eh, ngi don palat 50 ngut bad kumta haba buh ia ka jingdon jong ki ha ka jingmut jingpyrkhat, ngi hap ban pyn biang tarajur ia kiei kiei baroh da kaba niew kongsan ia ka jingangnud kat kum ki thain bad ki District. Ngim lah ban pynhun ia baroh hynrei ngi la pyrshang kat kaba lah” ula ong.
U Conrad ula ong ruh ba ka NPP kala bat ia la ka jingkular ia ki paralok ba iatreilang, wat ka don bun paid eh nalade.
“Kala don ka jingiasngewthuh jingmut kaba shai hapdeng ki paralok ba iatreilang bad kat kum ka jingiapynbeit jong ki hala ka party, nga long uba kloi ban pdiang ia ki jingai jingmut bad ban pyniaid shakhmat ia ka kam kat kum ka jingkwah ki paralok. Kumta, haba phai sha ki paralok ba iatreilang, nga la bat ia ka jingkular haba iadei bad ka jingsam ia ka shuki Myntri ba nga la ai sha ki. Nga hap ban kren ia kane hangne ba watla ka jingshisha ka long ba ka NPP kala don ia u paid nalade, ngi don 33 ngut ki MLA hynrei nga la shimkhia bha bad haba ngi la ai ia ki jingkular iala ki paralok ba iatreilang, ngin ym pynkhein satia ia kata ka jingkular bad kaei kaba ngi la kular ha u 2023, watla ka jingkylla ha ka sain pyrthei ha Jylla bad ka NPP kala nang bun paid, ngi la bat ia kaei kaba la kular” ula ong.
“Kaba ar, kumba ka ong ba haba phai sha ki Tnad kiba bat da ki katto katne ki paralok ba iatreilang, ngi la shim ia ka rai hadien ka jingiasyllok bad ki bad ki don napdeng jong ki, kila dep iapynbeit lypa bad kin sa ia bujli ia ka shuki Myntri hadien arsnem shiteng…ka jingiasngewthuh jingmut kala don hapdeng jong ki bad dei halor kane, kila jam shakhmat. Ki don ruh ki khep ba kila iakren ia kane ka kam hapoh ka party bad kila wan sha nga. Ngi la pynshong nongrim na kine kiei kiei baroh” ula bynrap.
Haba phai sha ka jinglong jingman hapoh ka NPP, u Conrad ula ong “Haba phai sha ki kam pohiing ka NPP, ngi don haduh 33 ngut ki MLA bad kumta ia ngi, ban ai ka lad ban mihkhmat na ki thain bad ki jaka bapher bapher ka long kaba kongsan bha. Mynta ngi don 4 ngut ki MLA na North Garp Hills bad kumta ngi sngew dei ba dei ban don ba mihkhmat na NGH haba buh hakhmat ia ka jingdon ki MLA n aka thain. Ha Ri-Bhoi, ngi don 4 na ka 5 ngut ki MLA bad kumta, kala don ka jingthoh bala phah bad ruh ka jingkwah ki paidbah ka Ri-Bhoi ba dei ban don ba mihkhmat na Ri-Bhoi ha ka Kynhun Myntri. Kine ki dei ki daw bad ki nongrim ba ngi la shim ia kane ka rai”.
U Myntri Rangbah ula kubur ba ka jingshim rai kam long kaba suk bad kaba lah ban shah kynthoh na ki liang bapher bapher. Hynrei, ula pynpaw pat ia ka jingsngewhun ia kane ka thup thymmai jong ki Myntri bad kular ban kyrshan ia ki Myntri thymmai ha ka kam ba ki trei.
U Conrad ula pynpaw ia ka jingsngew skhem ba kane ka Kynhun Myntri ba thymmai kan wanrah ia ka jingkylla kaba bha ha ka synshar khadar, haba pynleit jingmut ban pyntrei ia ki kam bad ki prokram na ka bynta ka roi ka par ka Jylla.
Ha kajuh ka por, u Myntri Rangbah ula pyntip ba ia ka bhah kam sha ki Myntri thymmai yn sa phah sha Governor Secretariat bad la khmih lynti ban sa pynmih jingpynbna ha ka sngi Balang.
