Shillong, K’lyngkot 19 : U Myntri kam Pohiing ka Ri Amit Shah ula ong ba ki 10 snem hapoh ka jingsynshar ka Sorkar Modi haka Ri, kala dei ka juk ksiar ia ka thain Shatei Lam Mihngi namar ka jingpynleit jingmut ba palat halor ki kam pynroi bad ka jingpynbeit ia ki kam iakajia kiba don ha ka thain.
U Amit Shah ula kynthoh ia kane haba ai jingkren ha ka 71st Plenary Meeting jong ka North Eastern Council (NEC) ba long hynne ka sngi Thohdieng ha Shillong.
Ula ong ba ka thain Shatei Lam Mihngi mynta kala kylla long na ka khana ki jingiakhih bad jingbym shongsuk sha ka jingbeh ia ka jingsuk bad ka roi ka par.
“Hapoh ka jingialam u PM Modi, ym tang ba ka jingjngai kala duna na ka thain Shatei Lam Mihngi sha Delhi bad sha kiwei ki bynta jong ka Ri namar ka jingmih ki kam pynroi hynrei ka jingsngewpher ha ka mynsiem ruh kala duna bha” ula ong.
“Ki 10 snem hapoh ka jingsynshar ka Sorkar u Myntri Rangbah Duh Narendra Modi kala dei ka phew snem ba kordor tam ia ka thain Shatei Lam MIhngi namar kala iohi ia shibun ki kam pynroi ha kine ki 75 snem naduh ba ioh ia ka jinglaitluid” ula bynrap.
Ula ong ba ka thain Shatei Lam Mihngi, kaba la iaksaid hapdeng shibun ki jingeh namar ka jingiapher Jaidbynriew, ka ktien ka thylliej, u khappud, ki kynhun kaikhlaw, kala ioh ia ka jingsdang jong ka juk ba thymmai bad ka jingsuk ha kine ki 10 snem.
U Amit Shah ula ong ba lada nujor kine ki 10 snem ia ka thain Shatei Lam Mihngi bad ki 75 snem hadien ba ka Ri ka ioh ia ka jinglaitluid, kane ka phew snem kan dei shisha ka juk ksiar jong kane ka thain.
Ula ong ba ka Sorkar u Modi ka ju kheit beit ia ka thain Shatei Lam Mihngi kum ka bynta ba kongsan eh jong ka Ri India.
Ula iathuh ba hapdeng u snem 2004-2014, haduh 11,121 ki kam umsnam kila jia hapoh ka thain Shatei Lam Mihngi hynrei kane kala hiar haduh 73% sha ka 3114 hapdeng u 2014 bad 2023.
Ka jingiap jong ki bor pahara ruh kala hiar da 71% n aka 458 sha ka 132 ngut katba ka jingiap jong ki nongshongshnong kala hiar da 86%.
Ula ong ba ki kam kaikhlaw ruh kila duna bha namar ha kine ki san snem bala leit noh, palat ia ka 8900 ngut ki dkhot jong ki kynhun kaikhlaw kila wan ban pyndem wait bad ia imlang noh ha ka imlang sahlang. Ula ong ba kane kala ai ia ka khubor sha ka Ri baroh kawei ba ka jingsuk bad ka jingroi shaphrang ka dei kaba don jingiadei bad khlem kine, ki Jylla kin ym lah ban kiew shakhmat.
U Myntri kam Pohiing u iathuh ba ka Sorkar u PM Modi ban wanrah ia ka jingsuk bad ka jingshngain hapoh ka thain, kala iasoi haduh khyndai tylli ki soskular bad kala lah ruh ban pynbeit ia bun ki kam kiba sah kiba kwah ia ka shongsuk shongsain.
Ula ong ba lait noh tang katto kane ki bynta jong ka Assam bad ka Manipur, 75% naki jaka ba hap hapoh ka Armed Forces Special Powers Act (AFSPA) ha u 2018 kila lait mynta na kane ka ain.
