Shillong, Nohprah 06: Ka Khasi Hills Autonomous District Council (KHADC) hynne ka sngi Balang, kala khynra Trading bad Labour License iaki dukan jong ki bar jylla kiba don hapoh Iewduh.
Ia kane ka jingkhynra Trading bad Labour License la lamkhmat da ki Executive Member ka tnad Trade Bah Gigur Myrthong bad kiwei ki MDC kata u Bah Gabriel Wahlang bad u Bah Fantin Lakadong haka jingdon lang ki Magistrate ka East Khasi Hills, u Syiem ka Hima Mylliem bad ki Myntri nalor ki Pulit ka Enforcement ka KHADC.
Ia kane ka jingkhynra la leh daka KHADC hadien bala ioh jingujor naka Khun Kynthei U Hynniewtrep Association ba pyntip ia ka jing jyllei ki dukan bar Jylla ki bym don ka Trading bad Labour License ha kane ka Iew ba hehduh ka Jylla.
Ki Pulit ka Enforcement kila khang noh iaki 6 tylli ki dukan ki bym don Trading bad Labour License bad ki bym pat pynthymmai iaki kot ki sla.
Haba kren sha ki lad pathai khubor u Bah Gigur ula iathuh ba naka liang ka KHADC ka shim khia iaka jingujor ka seng Khun Kynthei U Hynniewtrep Association hynrei ka long kaba sngewsih ba ki dkhot jong ka seng ba ujor ki khlem wan synran lang bad leit kynra Trading bad Labour License iaki dukan hapoh Iewduh.
U Bah Gigur ula ong ba naka liang ka KHADC kala leh iaka ba donkam bad kila don katto katne ki dukan ba shah khang hynrei ka District Council ka kren shai ba lada ki nong ujor kim wan synran lang, nangne shakhmat ka KHADC kan nym pynsngew shuh ia kum kine ki jingujor.
