La shu pyntip kyrkieh palat ïa ka shnong, ong u Sordar
Nongstoiñ, Risaw 17: Ki nongïalam jong ki kynhun sengbhalang bapher bapher hynne ka sngi nyngkong, ki la leit ban khynra Labour License kyndit kyndit ïa ki nongtrei bar jylla kiba wan shna їa ka pandal ha madan New Nongstoiñ, ban pyn khreh їa ka jingwan iuhkjat jong u Conrad Kongal Sangma Myntri Rangbah ka jylla la sngi hat majai.
Kine ki kynhun Sengbhalang ki kynthup ia ka HYC, MYF, UHM, WKSU bad WYF.
Kat kum ka jingtip bala ioh lum, ka Sorkar kala mang haduh 15 lak tyngka ban shna ia kane ka pandal ha madan New Nongstoin bad la shna ia ka na ka bynta ka prokram sam khun sniang bad sam syiar sha ki paidbah na ki skhim bapher bapher jong kane ka Sorkar MDA.
Ki kynhun Sengbhalang haba ioh jingtip ia ka jingwan trei bylla da ki bar jylla, kila leit ban khynra Labour Licence bad lap pynban ba bun na kine ki nongbylla kim don satia ia ki kot ki sla kynthup ruh ia ki EPIC bad kiwei kiwei ki kot ba donkam.
Namar kane ka jingshem, ki kynhun Sengbhalang kila pynsangeh ia ka jingtrei haba bthah ia u Contractor ba u dei ban pynbiang shuwa ia ki kot ki sla jong ki Nongbylla ban ioh bteng ia ka kam.
Ki Pulit ka Nongstoin, haba ioh jingtip ia kane, kila leit ban khang mardor ia ki Sengbhalang ban khynra ia ki kot ki sla bad kala mih pynban ka jingiatai nia kaba jur hynrei da ka jingwan poi u DySP Bah B Kharjana, la lah ban pynjai jai noh ia kane ka huri hura.
Hynrei da ka jingwan tuklar u Secretary jong ka shnong New Nongstoin uba la kren da ki kyntien ba khor pyrshah ia uwei u dkhot Sengbhalang, ka jingiania kala jur biang bad dei tad hadien ka jingwan poi ki nongialam ba kham halor, kane ka jingiajia kala jai jai noh.
Na ka liang ki Sengbhalang ka West Khasi Hills District, haba kren sha ki lad pathai khubor ki la ong ba la lap shibun ki mynder kiba wan ban trei hynrei, ki bym biang ïa ki kot ki sla kum ka Labour.
“Namar kane, ngi la pynsangeh ïa kane ka jingtrei. Na ka liang jong u Contractor u la kyrpad hynrei ngi la bthah ban pyn biang shwa ia ki kot shwa jong ki nongbylla ki bym don ia ki kot ki sla” kila ong.
Ki Sengbhalang ki pynrem jur ruh ïa u Contractor u ba la wanrah ïa ki mynder khlem kot khlem sla shwa ban trei bad ruh ïa ka Shnong kaba la shah ban shna ia kane ka pandal khlem jingtip ki dei kiei kiei kiba wan trei haba ong ba kane ka wanrah ka jingma ïa ka dong ka thaiñ lada ym pyrkhing ïa kiba nabar.
Haba їakren bad u bah S.Rashir sordar jong ka shnong New Nongstoiñ, ula pyntip ba ki bor sorkar kila shu pyntip kyrkieh ia ka jingwan jong u Myntri Rangbah ka Jylla.
“Ha ka jingshisha lada u Myntri Rangbah lane kino kino ki Myntri sorkar ki thmu ban leit sha kino kino ki shnong ne ki jaka, ki la dei ban pyntip lypa shitaїew lane saw sngi shuwa ban wan, khnang ba ka jingpynkhreh kan long kaba bit ba biang. Hynrei ha kaba їadei bad ka jingwan jong u MR ka jylla, ka dorbar shnong New Nongstoiñ ka dang їoh jingtip ha ka miet sngi saitjaiñ kata ar sngi shuwa ba u CM un wan” ula ong.
Une u Sordar u pyntip ba kat kum ka jingioh jingtip jong u, u Myntri Rangbah un wan ban sam sniang bad sam syiar sha ki paidbah hashuwa ba un leit jngoh ruh ia kawei ka jaka ai jinghikai tem sur tynrai kaba don ha Mawlangdep.
