Shillong, Lber 29 : Ki Pulit ka East Khasi Hills, ha ka miet sngi Saitjain, kila pynlong ia ka jingkhynra kam awria kaba jur ha kylleng ki jaka jong ka Sor Shillong bad ioh kem ia 16 ngut ki thei ba iaid kam awria kynthup ia 4 ngut ki pimp/agent (ki briew kiba iapynbeit bad ki nongleh kam awria).
Ia kane ka jingkhynra la pynlong ha ki bynta ka surok na Khyndailad Pegasus Hotel sha Presbyterian English Service Church mar pyrshah ka SBI Main Branch, Shillong, nalor ki bynta ka surok mar pyrshah ka Ophis MBoSE, Lachumiere, Shillong bad IGP Point.
Kat kum ka jingpyntip u Superintendent of Police ka East Khasi Hills Bah Vivek Syiem, ia kane ka jingkhynra la pynlong halor ka jingioh pdiang ia kiba bun ki jingujor na ki nongshongshnong ba ki nongtrei kam awria (sex workers) kila treikam na ki jaka bapher bapher kiba don marjan ki jaka leh niam kata ki Iingmane/Gurudwara.
Ula pyntip ba ka jingujor ka kren ruh halor ka jingnang kiew ka jingdon ki briew kiba don ia ka jingpang HIV ha shillong.
U Bah Vivek u pyntip ba ia kane ka jingkhynra la ialam da u Addl SP (Operation) Bah Ivan Diengdoh, bala synran lang da ka DySP WCC Kong Jyoti Wahlang, OC ka Sadar Police Station, O/C ka Women Police Station ka Laitumkhrah bad kiwei ki Ophisar ka District.
Ha kane ka jingkhynra, 16 ngut ki briew kila shah kem na kitei ki jaka bala kdew haneng katba ki dang leh ia ki kam kiba dei ki kam die met bad kam awria.
Saw ngut na kiba shah kem ki dei ki pimp/agent kiba pynsuk bad pynwad briew (shynrang) na ka bynta ka kam leh awria, kiba shim ia ka bynta ba kongsan ha ka jingpynbeit ia kane ka kam bymman.
Ki Pulit kila kurup ruh ia kawei ka Swift Dzire bad 2 tylli ki scooty kiba pyndonkam ha kane ka kam bymman.
Ki Pulit kila register ia kane ka case ha Sadar Police Station hapoh ka kyndon 4/5/7/8 The Immoral Traffic (Prevention) Act pule lang bad ka kyndon 110 jong ka Meghalaya Police Act pyrshah ia kine ki briew.
.){kind=link}