Nongpoh, Nailar 06 : Ka Hynniewtrep Youth Council (HYC)- Umbang Sumer Unit, ha ka sngi Balang, kala leit talasi ia ki kot ki sla jong ki nongbylla bar jylla kiba pyntrei ia ka surok Shillong Western Bypass bad la kynnoh ba ka kompani kala pyntrei bylla wat ia ki khynnah kiba dang hapoh ka 18 snem ka rta, kaba long pyrshah ia ka Labour Act.
Ha kane ka jingtalasi bala iaam da u President ka Unit Shiningstar War, la lap ba bun na ki nongbylla bar jylla, ki don satia ia ki kot ki sla kiba biang. Kine ki nongbylla bar jylla ki dei kiba pyntrei ia ka jingkieng jong ka surok Shillong Western Bypass kaba don ha shnong 4-number.
Haba kren sha ki lad pathai khubor, u Shiningstar ula ong ba ka Seng kala pynlong ia kane ka jingtalasi kot hadien ka jingoh jingtip ba don bun ki bar jylla, kiba wan trei ha katei ka shnong ki dei ki bym don kot don sla kynthup ia ka Labour Licence.
“Ngi la lap bun ki bar jylla ki bym don kot don sla bad ngi la phah lum phah lang ia ki tum ki tam jong ki bad phah leit phai shala ka jong ka jylla ba ki wan” ong u Shiningstar
“Ka Seng ka kwah ba katei ka surok kan dep kloi noh khnang ba kan long ka jingmyntoi ia ki paidbah ha ki shnong bapher bapher ka thain, hynrei ban pyntrei pat da ki bar jylla khlem da pynbiang ia ki kot ki sla bad da ki khynnah, ka seng kam lah satia ban pdiang bad kan khynra naphang ia ki” ula bynrap.
Ula pyntip ba kane ka jingkhynra hynne ka sngi ka dei tang ka jingsdang bad ka seng kan sa leit khynra biang sha kiwei kiwei pat ki bynta jong kane ka surok.
“Ki don shibun ki bar jylla ki bym ithuh ithaw kiba la wan trei bylla ha katei ka surok. Lada ngi lap ba kim biang ki kot k sla, ngin beh naphang beit ia ki” ula ong.
- Umbang Sumer Unit, ha ka sngi Balang, kala leit talasi ia ki kot ki sla jong ki nongbylla bar jylla kiba pyntrei ia ka surok Shillong Western Bypass bad la kynnoh ba ka kompani kala pyntrei bylla wat ia ki khynnah kiba dang hapoh ka 18 snem ka rta, kaba long pyrshah ia ka Labour Act.){kind=link}