Shillong, Lber 05 : Ki Pulit Anti Narcotics Task Force kila ioh kem ia uwei u nong Manipur ha Shillong bad ioh kurup ia u heroin ba jan kot 71 gram ha ka sngi Palei.
U Superntendent of Police ka ANTF Vikash Kumar ula ong ba ka ANTF kala ioh ia ka jingtip ha ka sngi Balang por 10 baje mynmiet ba pyntip ba uwei u nongkhaii droks Hegin Guite ula wan sha Shillong na Manipur bad sah ha ka kamra 115 jong ka Hotel Rainbow, Police Bazaar bad suba ba u rah lang ia u droks.
Ka kynhun ANTF kala leit khynra ia katei ka hotel shiteng miet.
“Ha ka jingkhynra, ka kynhun kala ioh kurup ia hynniew tylli ki synduk sabon ba thep ia u droks heroin. Ka jingkhia jong une u droks ka kot ia ka 70.93 gram” ula iathuh.
Ia u Guite la aiti noh sha Sadar Police Station ha ryngkat bad ki tiar ba ioh kurup. Ka ANTF kala ujor ia ka ejahar pyrshah ia une u nongkhaii droks.
