Leit iasoh sa u Bah Ronnie V Lyngdoh sha ka NPP
Shillong, Naitung 30 : Ka Indian National Congress (INC) kala khyllem jrain ha Meghalaya bad kut syndon ha ka jingdon Nongthaw ain hapoh ka Iingdorbar Thaw Ain ka Jylla (Meghalaya Legislative Assembly) da ka jingiehnoh kam sa u MLA ba sah marwei hapoh ka sem, Bah Ronnie V Lyngdoh.
U Bah Ronnie V Lyngdoh, MLA ka Mylliem, ha ka sngi Balang, ula ai ia ka shithi iehnohkam kum u dkhot ka Indian National Congress (INC), kaba la pynkut syndon ia ka Congress ban don ia ka sur hapoh ka Iingdorbar Thaw Ain ka Jylla.
U Bah Ronnie u dei u MLA uba khatduh napdeng ki 4 ngut ki MLA kiba jop ia ka elekshon 2023, uba la iehnoh ia ka jinglong dkhot ka Congress bad une u MLA ka Mylliem, u lah ban iasnohlang bad ki 3 ngut kiwei pat ki paralok, ban iasoh sha ka sem jong ka National People’s Party (NPP).
Une u MLA ka Mylliem ula leit ban aiti ia ka shithi sha u Speaker ka Iingdorbar Thaw Ain ka Jylla Thomas A Sangma, ba pynpaw ba ula leit iasoh sha ka NPP, ha ka jingiadonlang u Symbud Myntri Rangbah Bah Sniawbhalang Dhar, u MLA barim ka Mylliem Bah Hamletson Dohling bad u Nongialam ka NPP Bah Daniel M Thangkhiew.
Shuwa ia u Bah Ronnie, lai ngut ki MLA ka Congress kila leit pyniasoh sha ka NPP tang hapoh shisnem ba jop ia ka elekshon bad kine ki kynthup ia u President barim ka Meghalaya Pradesh Congress Committee (MPCC) Dr Celestine Lyngdoh, MLA ka Umsning, Bah Gabriel Wahlang MLA ka Nongstoin bad u Bah Charles Marngar, MLA ka Mawhati.
Da kane ka jingwan iasoh u Bah Ronnie, ka NPP kala nang hehpaid hapoh ka Iingdorbar Thaw Ain bad don mynta haduh 33 ngut ki MLA.
 kala khyllem jrain ha Meghalaya bad kut syndon ha ka jingdon Nongthaw ain hapoh ka Iingdorbar Thaw Ain ka Jylla (Meghalaya Legislative Assembly) da ka jingiehnoh kam sa u MLA ba sah marwei hapoh ka sem, Bah Ronnie V Lyngdoh.){kind=link}