LEICESTERSHIRE (UK), Iaiong 26: U samla Jaden Pariat uba iashimbynta ha ka ROKiT British F4 Championship kaba la long ha Donington Park, Leichestershire kaba don ha ri Bilat, ula wanrah nam ia ka ri India bad iaka jylla Meghalaya ban ioh ieng ha ka rynsan kum uwei na ki nongjop ha katei ka jingiakob.
U Jaden uba la mihkhmat iaka Argenti Motorsport, udei u ba-ar napoh ka ri India ban ioh ieng kum uwei napdeng ki nongjop ha ka Tatuus F4 car hadien jong u Kush Maini uba la jop ha u snem 2017.
“Ka jingioh ieng ha katei ka rynsan jong ki nongjop, kadei u mawjam uba kongsan tam ia ki nongniah kali Race kiba dang khynnah ka ban long kum ka jingplie lad ia ki ban iakhun tyngeh ha ka ban poi sha ka thong ban ioh syndon ban iakhun ha ka kyrdan kaba heh jong ka Formula Racing. Ngi dap da ka jingkmen kaba khraw bad ngi ai khublei ia baroh kiba la ieng bad don ryngkat bad ngi” ong u Atikur Rehman, uba long u nongniah ia ki kali race barim ka ri uba don ryngkat ban ai mynsiem ia u Jaden uba ha u snem ba la dep ula ioh ban ieng ha ka rynsan kum uwei na ki nongjop ha ka kyrdan Rookie.
U Jaden uba dang don 16 snem ka rta, uba la ioh iaka jingkyrshan na ka Minerva Virtual School, Lyca Radio bad Bobatree, ula ioh khur ia ka point ban wan Ba-lai haka Race 2. Ula lah ban iakhun ia ki raieh raidam bad ula ioh rung sha ka P17.
U Jaden ula pyni iaka la sap ka phong ha kaban niah iaka kali Race ha ka jaka kaba jhieh ban ioh ieng ha ka rynsan ki nongjop. Ula pyndep iaka Race 1 haka P11 ha ka kyrdan kaba hynriew hadien ba ula sdang na ka P17. Ha ka Race 3, ula ioh ban tam ia ki 5 ngut ban poi sha ka kyrdan kaba 12 ha ka jaka kaba jhieh bha.
Ha ka jingiakob kaba kham eh ne ka fully reversed grid race, kaba la pynlong ha ka jaka kaba eh bad kaba jhieh bha, u Jaden ula niah bha iaka kali race ka jongu ban lait na kano kano ka jingma, ha kaba kiwei pat ki nongniah kila shem jingeh ban tehlakam ia ki kali kaba ki niah, hynrei u Jaden ula poi sha ka thong ban long kum u nongjop.
“Nga dap da ka jingsngewhun halor ka result kaba nga la ioh. Nga sngewkmen bha ban ioh ieng ha ka rynsan kum u nongjop ha ka Race 2. Ka jingjhieh jong ka jaka niah ia ka kali Race bad ki kynrum kynram kiba don hakhmat jong ngi, hynrei kadei ka jingtrei borbah jong ka kynhun. Nga ioh iaka jingkyrshan bad jingiatreilang na baroh kiba don ha ka Lyca Radio bad ka Team ka jong nga ka Argenti. Ngam lah shuh ban ap ban leit ia khun sa ia kawei pat ka Race” ong u Jaden.
U Jaden mynta yn leit ban iakhun ia ka jingiakob race kali ha Brands Hatch ha kaba yn iakhun iaki 3 tylli ki Race haka 6-7 tarik u Jymmang.
