Shillong, Jylliew 08: U Nongialehkai ka Jylla Meghalaya u Sandeep Sharma ula thaw ia ka histori na ka bynta ka ri India da kaba ioh khur ia ka takma ksiar ha ka 24kg Snatch Half Marathon ha ka Kettlebell World Championship 2026 kaba la long ha Chisinau, Moldova, naduh ka 4 haduh 7 tarik u Jylliew.
Da kaba iakhun pyrshah ia ki nongrah nar khia na ki 27 tylli ki ri, u Sharma ula lam nakhmat eh ha ka kyrdan 74kg haduh 87kg+ bodyweight category. Ha ka jingiakob kaba don ia ka jingtynjuh jong ka jingkhlain ka bormet bad ka bor pyrkhat, ki nongiakhun ki hap ban rah ia 24kg kettlebell da kaba iai bteng lynter na ka bynta 30 minit khlem da pynhap hapoh madan.
U Sharma ula bteng ban rah khlem pynhap haduh 300 sien ban bat ia ka kyrdan kaba hakhmat da kaba pynkhein syndon ia la ka jongka rekod kaba rah haduh 228 sien ha u snem ba lah dep ha ri Italy.
Kadei ka sien kaba nyngkong eh ia u Sharma ban ioh khur ia ka takma ksiar ha ka World Championship bad ka takma kaba lai ba un ioh ha ka pyrthei.
Mynshwa ula ioh ia ka takma rnong ha Hungary ha u snem 2023 bad ha Poland ha u snem 2024, hashwa ba un wan ha ka kyrdan kaba 4 ha Italy ha u snem 2025.
Ka Kettlebell Snatch Half Marathon kadei kaba niew kum kawei na ki jingialehkai kaba dawa ia ka jinglong kaba ryntih bad ka jingrah da ki kti ia ki nar khia kaba lynter haduh shiteng kynta.
Kane ka jinglehbha u Sharma kadei kaba la ioh ia ka jingiaroh kum ka khyllipmat kaba sngewsarong ia ka jylla Meghalaya bad ia ka jingialehkai Kettlebell ha ka ri India ha ka rynsan jongka pyrthei.
Da kane ka jingjop, une u nongialehkai na Shillong ula sdang ia ka lynnong kaba thymmai ha ka jingbteng ban thaw rekod ha ka pyrthei, da kaba wanrah ia ka takma ksiar ia ka ri India na kawei ka jingtynjuh bor ha ka jingkhlain.
