Shillong, Iaiong 10: Ki nongialehkai ka Jylla Meghalaya kila lah ban ialehkai bha haka lympung First Khelo India Tribal Games 2026 kaba long ha Chhattisgarh naduh ka 25 tarik Lber haduh ka 3 tarik Iaiong daka ba ioh khur 2 tylli ki takma ksiar bad 7 tylli ki takma rnong ha kylleng ki jait jingialehkai.
U Donkupar L Shadap na Nongpoh, Ri-Bhoi uba la khur ia ka ksiar ha ka Compound Men’s Archery bad u la ai burom ia ka jingjop jong u lyngba ki jingshah hikai pyntbit bad ka jingkyrshan jong ka Sorkar. “Ka jingsngewtynnad jong nga ia kane ka jingialehkai siat khnam ka la sdang naduh ka rta kaba 5 snem. U kpa jong nga u ju ialam ia nga ban peit ia ki jingiakop siat khnam ha ka shnong jong ngi. Nga ju peit ia ki nong siat khnam haki Olympic bad kane kala nang ai mynsiem shuh shuh ka nga ban pyntbit ha kane ka jingialehkai” ula ong.
U la bynrap, “Nga ai khublei ïa u Myntri Rangbah ka Jylla, u Conrad K Sangma, uba la pynbha shuh shuh ïa ka jingïalehkai siat khnam. Ki tiar siat khnam ki long kiba rem, ki shongdor kumba T.3 lak hynrei ngi la lah ban shah hikai pyntbit da kaba pyndonkam ïa ki tiar kiba bha lyngba ka jingkyrshan na u Myntri Rangbah ka Jylla, ia kaba mynshwa ngim ju ioh”
Ka Kate Diamond Lyngdoh na Mawlai Kynton Massar, Shillong kaba la khur ïa ka takma ksiar ha ka Compound Women’s Archery bad mynta ka buh thong ban poi shaka jingjop sa ha ka National Games kaban sa long shen. “Ka jingthmu jong nga ka long ban ioh ia ka takma ksiar ha ka National Games ka ban sa wan. Ka Sorkar ka la kyrshan bad ka la pynbiang ia ngi ia ki tiar kiba donkam. Ngim donkam ruh ban lut na lade ha ka leit ka wan” kala ong.
U Juh Pa U Juh Nongtdu na Nartiang, West Jaiñtia Hills uba la ioh khur ïa ka takma rnong ha ka 60 kg Greco-Roman wrestling mynta u dang pynkhreh ban poi shaka thong haka 39th National Games 2027 ka ban long ha Meghalaya. “Nga sngewkmen haduh katta katta bad nga kwah ban ai khublei ïa ka Sorkar Meghalaya kaba kyrshan ïa ngi, ki nongïalehkai, la ka long lyngba ki jingshah hikai pyntbit ne daka wanrah ki Coach nabar kiba pynkhreh ïa ngi na ka bynta ka National Games,” u la ong.
U Bah Isaiah Kharmawphlang, uba dei ruh president ka Wrestling Association of Meghalaya u la kdew ïa ka jingdon ka jingkylla haba iadei bad ka jingkyrshan ïa ki nongïalehkai. “Ngi kyrmen ba kin nang bun ki samla kiba shim ia ka kam ialehkai namar ba ka don shibun ka lad ha ka. Ngi sngewnguh ia ka jingkyrshan ba ngi ioh na ka Sorkar Meghalaya. Mynshuwa, ngi shem jingeh khamtam haba iadei bad ka jinglut jingsep namar ngi hap lut na pla lade. Mynta kiei kiei baroh ki la kylla. Ki nongialehkai bad ki Association ki ioh jingkyrshan bha naka Sorkar” u la ong.
Da kaba pynroi ia palat 300 tylli ki jaka ïalehkai bad daka jingiashim bynta palat 35,000 ngut ki nongialehkai ha ki jait jingialehkai bapher bapher ha ki lympung ïalehkai hapoh ka Jylla, ka Meghalaya ka dang kiew kum ka jaka pdeng na ka bynta ki jingïalehkai, la pynpaw ka tnad Sports & Youth Affairs
