Shillong, Jymmang 07: Ka kynhun ialehkai jong ka Shillong Cricket Association B (SCA-B) kala ioh rah iaka nam lahduh jongka ka MCA U-16 Boys’ Inter-District Tournament 2025 da kaba jop da 8 wiket iaka Tura District Cricket Association (TDCA) ha ka phainal kaba la long ha Jowai hynne ka sngi Balang.
Ia kane ka jingiakob ialehaki la pynlong da ka Meghalaya Cricket Association (MCA).
Ka Tura kaba la jop ia ka jingkynting pisa ne Toss, kala jied ban leit tied nyngkong ha kane ka phainal jong ka One Day, ia kaba la pynduna noh na ka 50 over sha ka 42 over. Hynrei kila kamai 106 run bad hap lut ki nongtied ha ka 41.4 over.
Haba beh ia katei ka thong, ka SCA-B kala jop da kaba suk bad kala kamai ia ka 107 run bad hap tang 2 wiket ha ka 22.2 over.
U khlur ha kane ka jingialehkai u dei u Suraj Chettri, uba la kamai 71 run na ki 79 bol bad ym shim la Out satia.
Katba u Aniket Poddar jong ka Tura udei uba la ialehkai bha marwei hi uba la ioh ban shim 2 wiket bad udei ruh uba la kamai bun run n aka bynta ka Tura da kaba ioh 31 run abd ym shim la Out satia. Katba u Doangkam Ch Marak ula kamai 25 run, hynrei kiba bun hi ki nongtied jong ka TDCA kim shym la lah ban ialehaki bha.
Ia ka SCA-B, ha ka jingleit kawang bol, u Arav Baraily ula ioh khur 3 wiket, u Navneet Sah bad u Piyush Ray kila ioh khur mar 2 wiket.
Ia kane ka jingialehkai ia ka phainal la wan ban sakhi da ki heh ki hain kiba kynthup ia u MLA ka Jowai uba long ruh u Chairman ka MUDA u Bah Wailadmiki Shylla, u Assistant Director jongka Directorate of Sports and Youth Affairs u Bah Khroobok Passah, u Honorary Secretary ka MCA u Bah Rayonald Kharkamni bad ki dkhot jongka West Jaintia Hills District Cricket Association bad kiwei kiwei.
Ia kane kaj ingiakob la sdang ha ka 15 tarik u Iaiong ha kaba la pynlong ia ki jingiakhun jong ki group-stage ha Jowai bad Mendipathar.
Ha ka sngi Nyngkong ha ka jingiakhun ia ka semi final, ka TDCA kala pynliem ia ka Ri-Bhoi DCA da 20 run kaba la long ha Mendipathar, katba ka SCA-B pat kala pynrem ia ka East Khasi Hills CA da 9 wiket ha ka jingiakhun kaba la long ha Jowai ban ioh rung sha ka phainal.
