Shillong, Risaw 19: Ka Jylla Meghalaya kala ioh khur ia saw tylli ki takma na ka lympung ialehkai 34th East Zone Athletics Championship, kaba la kut noh hynne ka sngi Palei ha Kolkata.
Ha kane ka lympung, ki nongialehkai ka Meghalaya Athletics Association (MAA) kila jop ia 2 tylli ki takma rupa bad 2 tylli ki rynnong.
Lah ban kdew ba ha u snem bala lah, ka Jylla kala ioh khur 5 tylli ki takma na kane ka lympung kaba long ha Patna, kaba kynthup ia kawei ka takma ksiar.
Ka Meghalaya kala phah haduh 37 ngut ki nongialehkai bad arngut ki Official sha kane ka lympung ialehkai ha Kolkata kaba la sdang naduh ka 17 tarik Risaw bad kut ha ka 19 tarik Risaw.
I heprit Rukini RT Dkhar ila ioh ia ka takma rupa ha ka U-14 girls’ 600m race ha kaba ila lah ban pyndep ia ka jingmareh ha ka por ba 1 minute, 42.80 seconds.
Ki lai ngut kiwei pat kiba la ioh ia ka takma ki la wan na ka jingialehkai high jump.
Kine ki dei ka samla Sibilda Maring kaba la lah ban kynthih haduh 1.45m ban ioh rah ia ka takma rupa ha ka U-16 girls’ category.
Ka samla Anrisha Klein kala lah haduh 1.50m ha ka U-18 girls’ category, katba u samla N Sangma ula lah haduh 1.80m ha ka U-20 men’s. Une ruh ula ioh rah ia ka takma rynnong.
Ka MAA kala ai khublei ia ki nongioh takma, ia I coach Pleasantly Synnah bad physio Maradona Khongsni, haba ai khublei ruh ia ka Sorkar Jylla namar ka jingkyrshan bad iarap song pisa.
