Shillong, Jylliew 30: Ka Mawsynram kaba dei kawei na ki Shnong ba rit ha Meghalaya, kala bat la slem ia ka nam kum ka jaka ba jur bha ia u slap ha ka pyrthei, hynrei da ka jingkylla ka suinbneng bad jinghap slap, kala buh jingkylli la ka Mawsynram kan dang lah ban bat sah ia kane ka nam.
U Myntri Rangbah ka Jylla Conrad K Sangma haba kylli halor kane ka kam, ula pynpaw ba ka jingduh noh ia ka nam kum ka “Jaka ba jur slap tam ha Pyrthei” kan dei ka kam kaba sngewsih ia ka Meghalaya.
U Myntri Rangbah ula ban jur ba kane ka jinglong jingman ka dei ka bym lah ban leh eiei da ka bor u briew bad ong ba baroh kiei kiei ki wan jia namar ka jingkylla ka suin bneng bad ka jingnang khluit ka pyrthei.
“Ka dei, hooid, ka kam ba pynkhuslai ia ngi” ong u Conrad haba bynrap “Ka jingkylli ka suin bneng kala ktah ia ki jaka kum ka Mawsynram, kaba iatip baroh halor ka jingioh slap”.
U Conrad ula ban jur ba katba ka nam ka dang neh ha Meghalaya bad ki nongshongshnong jong ka, ka long kaba donkam ban ithuh bad tip ia ki jingktah jong ka jingkylla ka suinbneng.
U Conrad ula ban jur ia ka jingdonkam ban iatreilang ha kaban leh eiei halor ka jingkylla ka suinbneng.
Pule ruh: Kyntu u Conrad ia ka Sorkar Pdeng ban thaw lad ia ka jingsuk ha Manipur
