Tura, Rymphang 18: U Myntri Rangbah ka Assam u Himanta Biswa Sarma, uba long ruh u nongialam ka seng BJP, hynne ka sngi Saitjain ula leit ban ialap elekshon ha ki 4 tylli ki jaka kiba don ha rilum Garo bad ula kyntu ia ki paidbah ba kin kyrshan bad ba kin jied iaki kyrtong jongka seng BJP ha ka elekshon MLA 2023.
U Himanta ula leit ban ialap elekshon ha Mahendraganj, Rongjeng, Mendipathar, bad Kharkutta ha kaba ki paidbah kila wan tuid sha kitei ki jingialang ban ai jingkyrshan ia ki kyrtong jongka seng BJP.
Haba kren ha kitei ki jingialang paidbah, u Himanta ula kyntu iaki paidbah ba kin vote ia ka BJP bad ban pynjop iaki kyrtong ki jongka khnang ba ka jylla Meghalaya kan ioh pdiang kloi ia ki kam pynroi na ka sorkar pdeng kaba ialam hi da ka BJP.
Une u nongialam ka BJP ula ong ba tang katto katne ngut ki paidbah ka jylla Meghalaya kiba la ioh jingmytnoi lyngba ka PM Awas Yojna haba ianujor bad ka jylla Assam bad ula ong, lada ka BJP ka wan ha kabor ki paidbah kin ioh thikna ia kitei ki skhim.
U Himanta Biswa ula kren ruh halor ka Arun Uday Scheme kaba la treikam bha hapoh Assam bad lyngba kane ka skhim kano kano ka kynthei kaba dang marwei ne ka longkmie jong ka longïing baduk ki ioh pdiang T.1200 man la ka bnai bad kila don haduh 35 Lak ngut ki kynthei kiba ioh ia katei ka skhim ha Assam man la u bnai bad ka BJP ka lah ban pyntreikam ia kane ka juh ka skhim ha Meghalaya lada ka wan ha ka bor.
Ula iathuh ba ka sorkar BJP ha Assam kala kular ban ai kam ia ki Shi Lak ngut ha u snem ba la dep bad na kane haduh 50,000 ngut ki samla kila shah thungkam bad hapoh u bnai Jymmang mynta u snem yn sa thungkam sa ia kiba dang sahteng.
U Myntri Rangbah ka Assam ula ong, ki samla ka Meghalaya kila mad ia ka jingeh kaba khraw namar ka jingbym iohkam iohjam bad dei tang ka sorkar BJP kaba lah ban wanrah ia ka roi ka par kaban thaw ia ki lad iohkam iohjam ha ka jylla.
