Shillong, Lber 18 : U MP ka Congress na Shillong Bah Vincent H Pala, ula khroh ia ki briew kiba kyrshan ia kiwei kiwei ki seng sain pyrthei ba kin iatylli bad ai vote sha ka Congress ha ka elekshon Lok Sabha, ka ban long ha ka 19 tarik Iaiong.
Haba kren ha ka rynsan ialap elekshon ha Malangkona bad Athiabari, West Khasi Hills ha ka sngi Saitjain, u Bah Pala ula ong “Kamp her la phi don bad kano kano ka seng sain pyrthei, la ka dei ka NPP, TMC, UDP lane VPP, to ngin iatylli bad kyrshan ia ka Congress namar ha Delhi, ki ban thaw Sorkar ki dei beit tang ka Congress lane ka BJP”.
Ula ong ba lada ka Congress ka khlain bor, ka jaidbynriew ruh kan long kaba khlain bor,
Haba pynpaw ba ka synshar khadar ka lah shiliang kumba long mynta, u Bah Pala ula ong “Kiba riewspah kila nang riew spah bad kiba duk kila nang duk. Ki briew ba don ha ka bor kila nang riewspah”.
U Bah Pala ula ong ba ki MP ki dei ki nongthaw policy…”Kano kano ka policy ba thaw ha Delhi, ki Jylla kin hap ban pyntrei kam ia ka. Lad aka Delhi ka wanrah ia ka polici na ka bynta ki Hindu, ki Hindi kin kmen, lada ka dei ka polici ki Khristan, ki khristan kin kmen, ka policy ia ki nongkhaii, ki ruh kin kmen hynrei kane kam long kumta, ka synshar khadar ha India ka dei ban long ne iaid kat kum ka riti synshar ka Ri”.
Ula ong ba ka Policy jong ka Congress ka long ba ka kamai kajih jong u duk u suk kan nang kiew katba kiba riewspah kin iarap ban siew ia ka khajna ban ioh iarap ia kiba duk bad aikam ruh ia baroh.
“Kane ka dei ka jingiapher hapdeng ka Congress bad ka BJP” ula bynrap.
