Shillong, Naitung 31 : Palat 1046 ngut ki Nos kila pynrung kyrteng ialade sha ka jingthungkam shabar ka Ri India (Overseas Job Fair) kan sa long ha Nongbah Shillong ha ka 4 tarik u Nailar.
Haba pyntip ia kane hynne ka sngi Nyngkong, ka Myntri ka Koit ka Khiah Kong Ampareen Lyngdoh kala ong “Ngi la rai ban pynlong ia ka job fair na ka bynta ki nos kibym pat iohkam hapoh ka Jylla Meghalaya bad kiba kwah ban leit trei shabar jong ka Ri”.
Kala pynpaw ba katto katne ki Ri kila pynpaw ia ka jingkwah ban aikam bad thungkam ia ki nos kiba dei na Meghalaya. Kine ki kynthup ia ka Japan, United Kingdom, UAE, Germany bad Australia. Kat kum ka jingong jong ka, ka don ruh kawei ka kompani na Singapore kaba la pynpaw ia ka jingkwah ban iashimbynta lang ha kane ka job fair.
“Kane kan dei ka kam ba nyngkong ba ngi kwah ban leh namar kala wan sha ka jingtip jong ngi ba ki don bun ki nos kiba khlem lam hangne ha Jylla Meghalaya” ong ka kong Ampareen.
Kat kum ka jingong jong ka, ki nos kin ioh ia ka jinghikai pyntbit ba hynriew bnai ba kynthup ia ka jingpnah ban kren ia ki ktien. Ki jaka ai jinghikai kin long ha ki Sor ka Ri India-Delhi, Mumbai bad Bangalore.
Halor ka bynta jong ka Sorkar, ka Kong Ampareen ka iathuh ba ka Sorkar ym tang ba kan wanrah ia ki riewshemphang sha ka job fais hynrei kan pynlut ruh haduh T.50,000 ban ai jinghikai pyntbit ia kawei pa kawei ka nos.
Kala pyntip ruh ba ka Sorkar kan sa iasoi ia ka Memorandum of Understanding bad ki kompani bapher bapher haba ong “Namar ngim kwah ba kino kino ki Nongshongshnong jong ngi kin ujor ba kane kam biang, katai kam biang, kim shimkhia ia ki jingdonkam jong ngi, kim ai ia ki jaka sah bad ter ter”.
“Kaei ka tulop ba ki nos kin ioh ban rah shala Iing-ka jingsiew hi kan long hapdeng T. 1.5 lak haduh T. 2 lak shibnai” kala ong haba bynrap ba nalor ka bailut baisep jong ka jaka sah bad ka jingpynlut ha ka jinghikai pyntbit yn sa khate noh na ka tulop jong ki.
Haba khot sngewbha ia baroh ki nos ha Meghalaya ba kin wan iashimbynta ha kane ka job fair, ka Kong Ampareen kala ong “Lada phim don kam bad phi sngew ba phi la sngew lah ban leit ne trei shabar ka Ri sngewbha ban wan sha kane ka prokram ha kane ka sngi”.
“Palat 1000 ngut kila dep pynrung kyrteng bad ngi. Ngi kyrmen ban ioh bun ki nos ki ban wan sha kane ka prokram. La ka long ne em ba ki briew bym pat pynrung kyrteng ba kin wan, phi lah ban wan bad ngin shah ia phi ban iakren bad kine ki kompani ki ban pynlong ia kane ka job fair. Phin sa nang ioh ia ki jingtip ia baroh ki jingtip ba bniah bad nga kwah ban pynshlur ia baroh ki nos ba kin wan sha ka job fair bad ban tip la phi lah ne em ban leit trei shabar ka Ri” kala ong.
Palat 12,000 ngut ki nos kila pynrung kyrteng ialade kum ki dkhot jong ka Nursing Council of Meghalaya hynrei, ym shym la don jingkhein pat ba haduh katno ngut ki dei ki bym pat iohkam.
Nalor kane, ka Myntri ka pyntip ba palat 5000 tam kila pynrung kyrteng ha ka eksam nursing ba dang shu dep pynlong hapoh ka Jylla ha kaba tang 202 ngut kila ioh kam ha ki jaka sumar ka Sorkar.
Pule ruh: Kyrpad u Myntri ia ka Smriti Irani ban buh ICDS ha ki 1500 tylli ki Shnong ha Meghalaya
 kan sa long ha Nongbah Shillong ha ka 4 tarik u Nailar.){kind=link}