Nongstoiñ, Naiwieng 16: Kum shibynta ban pynsngewthuh їa ki muster roll kiba trei ha ki tnad treikam jong ka sorkar, hynnin ka sngi hat majai ka 15 tarik Naiwieng u bah M.Kharbuddon Inspector ka Labour Department West Khasi Hills, u la khot lang їa ki 113 ngut ki muster roll kiba trei hapoh ka Nongstoiñ Division, ban pynshai їa ki lad jingїarap kiba ka sorkar ka la mang kyrpang na ka bynta jong ki lyngba ka E.shram.
Ïa katei ka jingїalang la pynlong ha phyllaw jong ka ophis PWD ha kaba la pynїaid da u bah Shimbor Diengngan Executive Engineer PWD (PMGSY).
Ha katei ka jingїalang u bah Kharbuddon u la pynshai ba baroh ki muster roll ne ki Misteri, ki nongbylla sngi kiba la register їa ki kyrteng jong ki ha ka eshram, lyngba ka Labour Department bad kiba la don їa ki Adhaar card bad Pan card, ki lah ban їoh їa ki jingїarap lada ki ngat ha kino kino ki jingmynsaw ne aksiden, ha ka por ba ki trei їa ki jingtrei.
Utei u heh sorkar u la pynshai ruh ba na ka bynta kito ki bym pat register, ki lah ban phah regsister lyngba ki Common Service Centre (CSC) kiba la ju tip kum ki Rainbow. Ki bym pat don card ki lah ban aplai їa ki card jong ki lyngba kitei ki centre hynrei ki hap ban siew pat shispah tyngka kum ka bai kot sada bad ka bai print.
Ha kajuh ka por u la pynshai ruh ba їa ki card ba ki la їoh kim donkam satia ban pynthymmai kumba long kiwei ki card, hynrei shisien ba ki la їoh kin neh kumto shi jingim.
