Shillong, Jymmang 08: Ka Voice of the People’s Party (VPP) hynne ka sngi ka la khot bad iawer ia ki paidbah ka Bri u Hynniewtrep ba kin wan ban iasynranlang ia ki nongialam ka VPP ha ka 12 tarik u bnai ban leit buh dorkhas sha u Myntri Rangbah ka jylla u Conrad K Sangma, kaba dawa ban pynsangeh noh mardor ïa ka jingthung kam thungjam hapoh ki tnad treikam sorkar kat bym pat pynbeit ia ka State Reservation Policy.
Kane ka jingkhot bad jingwer ka VPP iaki paidbah ka dei namar ka jingkuman ka sorkar ban khot daka dorbar kyrpang ban iathir halor ka jingdonkam ban bishar bniah shwa iaka Reservation Policy bad ban pynsangeh iaka jingpyntrei iaka Roster System.
Haba kren sha ki lad pathai khubor nongaiktien ka VPP u bah Batskhem Ryntathiang ula kam ba ha u bnai Lber 2023, baroh 4 ngut ki MLA ka VPP kila leit ban buh daka dorkhas sha u Myntri Rangbah ka jylla ban dawa khot daka dorbar kyrpang hynrei haduh mynta ka sorkar MDA kam shym patiaw halor kane ka jingdawa.
U bah Batskhem ula ong ba kane ka jingdawa ka VPP ban pynsangeh noh mardor ïa ka jingthung kam thungjam hapoh ki tnad treikam sorkar bapher bapher ka dei halor ka nongrim ba dei ban pynkylla shuwa ia ka bhah thungkam lane ka Job Reservation Policy bad ban pynsangeh shwa ia ka jingpyntreikam ia ka Roster System. Ula ong ba kane kam dei naka bynta ka jingmyntoi shimet jongno re jongno hynrei kadei naka bynta ka bha ka miat ki samla hapoh ka jylla Meghalaya baroh kawei.
“Ka VPP hadien ka jinglah ban leit sha baroh ki nongbah district ban pynsngewthuh iaka jingdonkam ban bishar bniah iaka Reservation Policy bad ka jingdonkam ban pynsangeh shwa iaka Roster System, ka khot iawer iaki paidbah haka 12 tarik Jymmang 2023 ha ka por 2 baje nohphaisngi ba synran iaki nongialam ka VPP leit ban ai da ka jingthoh sha ka sorkar ha Secretariat” la ong u bah Batskhem.
U bah Batskhem ula ong ba kane ka jingiawer iaki paidbah kam dei satia ka jingiakhih hynrei kadei tang ka jingpyni shaka sorkar ba ka VPP ka ioh ka jingkyrshan na ki paidbah khamtam haba iadei bad ka jingdawa khot dorbar kyrpang ban iatai halor ka Reservation Policy bad ka Roster System.
Haba iadei bad kane u bah Batskhem ula kyrpad ba ki paidbah kiba wan ban ai ka jingkyrshan ia ka seng VPP bad ia ki MLA ka seng haka 12 tarik mynta u bnai, kidei ban long ki briew kiba jai jai bad kiba kitkhlieh bad kiba bud ryntih ïa ka aiñ khnang ba kan nym mih kano kano ka jingklumar.
Haba kylli hato ka VPP kan pdiang ne em lada ka sorkar ka khot ka jingiakren jong baroh ki sengsain pyrthei, u bah Batskhem ula ong ba ka Party ka kloi ban shim bynta ha kano kano ka jingiakren ka ban wanrah iaka bha ka miat jong baroh hynrei, la ka pdiang ne em iaka rai ka ban mih, kan shong hi hadien ka jingialang.
