Shillong, Nailar 11 : Ka Meghalaya Model United Nations (MMUN), kaba dei ka kynhun kaba trei na ka bynta ban mait lynti bad btin ia ki samla ha ka lympungbah jong Ka pyrthei khamtam eh ha ka sain pyrthei bad ka jinglong jingman ha ka sain hima sima ka la pynkhreh ban pynlong ia ka jingiakynduh lang kaba lai kaban long ha ka 13tarik, 14tarik bad 15tarik mynta u bnai.
Ia katei ka jingkynduh lang kaban long ha ka sien kaba lai kaba la tip kum ka Meghalaya MUN Conference yn pynlong ha St. Edmund’s Higher Secondary School, baroh lai sngi, kata naduh ka 13 haduh 15tarik mynta ubnai.
Ka kyrwoh ka ong ba ka thong ba hakhmat eh jong katei ka lympung ka long ban ailad ia ki samla ba kin ioh ban mih shakhmat bad long kiba shlur ban kren paidbah, wad bniah lane wat kumno ban ngam jylliew ha ka pyrkhat pyrdain lane wat ha ka thoh ka tar ruh.
Na ka liang ki bor pyniaid ki la pynbna ruh ba ki pdiang sngewbha ia kumba 500 ngut ki nongshim bynta kiban wan na kylleng ki distrik jong ka Meghalaya bad ruh na kiwei ki jylla jong ka thain shatei lam mihngi jong ka Ri.
