Shillong, Naitung 9 : U Special Officer bat hung da ka Iingkashari Meghalaya High Court, u ban khmih ia ka jingpyntreikam ia ki hukum ba iadei bad ka kam ki nongshong dukan madan, un pynlong ia ka jingialang lang bad ki bor Pulit bad ki nongshong dukan mahan ha ka 16 tarik Naitung.
Ia kane la pyntip da u Chief Executive Officer (CEO) ka Shillong Municipal Board (SMB) PK Boro ha ka notice ba pynmih ha ka sngi Ba-ar.
Kane ka jingialang kan buddien ia ki hukum bala pynmih da ka Iingkashari ha ka 3 tarik Naitung, kaba la thung ia u Special Officer ban pynthikna ba la pyntreikam ia ki hukum ka Iingkashari khlem ka pynthut ia ka suk ka sain lane leh ia kino kino ki kam ba be-ain, ha ryngkat ka jingiasyllok bad u General Secretary ka seng ki nongshong dukan madan bad ki Pulit, ong u Boro.
Ha ka 3 tarik Naitung, ka Iingkashari kala tuklar halor ka jingiaid ka jingkyndang ia ki nongshong dukan madan ha ka thain Khyndailad, haba bthah ia ki bor Sorkar bad Pulit ba kin bud ia ki kyndon ka ain.
Ka seng ki nongshong dukan madan kila buh ia ka aplikeshon ba kynnoh kyndang jubor khlem da ai ia kiwei pat ki jaka ban shong dukan madan.
Ka Iingkashari kala thung ia u senior advocate Subhasis Chakrawarty kum u Special Officer ban peit ia ka jingpyntreikam ia ki jingbthah ka Iingkashari.
Ka Iingkashari kala bthah ia u Special Officer ba un pynkhreh ia ka thup ki nongshong dukan madan kiba la ioh jingtip bad don licence, kaba la pynpaw ba ki don 349 ngut, ha ryngkat ka jingiasyllok bad ka seng ki nongshong dukan madan lem bad ki bor ba dei khmih.
Ka Iingkashari kala bthah ruh ban shah ia ki nongshong dukan madan ba don licence ba kin die ia ki mar ki mata ha ki thain Police Bazaar da ka por (12:30 janmiet haduh 2 baje janmiet bad 7:30 baje mynmiet haduh 9 baje mynmiet), kata ruh hadien ba kila kular ba kim dei ban shong palat ia ka por bad pynthut ia ka jingiaid ki kali bad ki briew. Ia ki nongshong dukan madan ki bym don licence ym dei ban shah ban die mar ha ka thain.
