Nongpoh, Iaiong 17: Ka Synjuk ki Rangbah Shnong Ri-Bhoi District ka la rai ban khot da ka jingialang paidbah ha Ri-Bhoi District namar ka jingsngewkhia kaba jur halor ka hukum jong ka Khasi Hills Autonomous District Council (KHADC) ba khang ia ki Rangbah Shnong ban iashimbynta ha ki kam sain hima sima.
Haba pynbna ia kane lyngba ki lad pathai khubor, u Nongialam ka Synjuk Bah BB Makdoh, Chairman bad u Bah PB Sylliang Secretary, kila iathuh b aka Synjuk kala rai ban pynlong ia kane ka jingialang ha ka 19 tarik Iaiong ha Umsning Auditorium naduh ka por 10 baje mynstep.
Kat kum ka jingong jong ki, ka rai jong ka KHADC ka dei ka bym lah satia ban pdiang namar ki Rangbah Shnong ki long lait luid ha ka kam kaba ki shakri. Kila ong ba ki Rangbah Shnonng kim lah ban pdiang ia kane ka hukum haba ong ba watla ki Rangbah Shnong ki ju iashimbynta ha ka kam sain hima sima, hynrei kim don pat ka hok ban pynbor ia ki paidbah ban thep vote namar ka rai hi ka shnong ha ki nongthep vote shano ba ki iamon.
Kila pyntip ruh ba nalor kane ka hukum ka KHADC, ka Synjuk kan iakren ruh halor ka jingrem dor palat ka rai register khyndew, ka jingpynbeit pud bad ka Sorkar Assam jong ka wat kaba ar, ka roster system ka bhah thungkam thungjam bad kiwei kiwei.
Ka Synjuk kala khot ia baroh ki Rangbah Shnong ka Ri-Bhoi ban iapoi ryntih sha kane ka jingialang ban iatai ia kine ki mat kiba dei ki kam iap kam im jong ka Jaidbynriew.
