Shillong, Naiwieng 02: Ka ophis u Syiem ka Hima Mylliem ha ka sngi Balang kala khot hajir ia ki ar ngut ki briew na ka jaidbynriew Garo, kiba la kam ialade ba kidei ki Rangbah Shnong ha ka shnong Pilangkatta, Ri Bhoi District halor ka jingkynnoh ba ki donkti ban die ia ki jaka sha ki bar jylla ha katei ka thaiñ.
Ia katei ka jingialang la pyniaid da u Basan bad ki Myntri ka Hima Mylliem, ha kaba la iadonlang u Syiem ka Raid Marwet u Paiem Ken Sing Syiem, u Liveson Sangma uba la kam Rangbah Shnong ialade, katba u Chota Sangma ruh uba la kam Rangbah Shnong ialade ym shim la wan mih ha katei ka jingialang.
Katei ka jingkhot hajir ka Hima Mylliem ka dei hadien ba ki nongialam ka Hynniewtrep National Youth Movement (HNYM) kila ujor sha ka Khasi Hills Autonomous District Council (KHADC) pyrshah ia kine ki ar ngut kiba la kam Rangbah Shnong ialade bad kiba la die ruh ia ki jaka ki puta sha ki bar jylla.
U President ka HNYM u Bah Louis Dohtdong ula ong, ka Hima Mylliem kala shim ia ka rai ba naduh mynta ka sngi, kan sa phah da ka jingpynbna paidbah sha baroh ki ophis sorkar kiba don ha Ri Bhoi District khamtam ha ki thaiñ Khappud, ba ka Hima kala pynduh pyndam noh ia ki NOC bad ki kot ki sla, kiba la ai da ki briew kiba la shu kam hi ialade kum ki Rangbah Shnong.
Ula ong, ka seng ka shaniah 100 naka 100 haka Hima Mylliem ba kan pynduh pyndam noh ia kitei ki kot ki sla kiba la ai da kitei ki briew kiba la shu kam ialade kum ki Rangbah Shnong bad ka seng kam kwah baka kyntien Nongpyniaid Shnong kan kylla pynban ka kyntien Rangbah Shnong bad kine ki Garo ki pyndonkam iaka kyntien Rangbah Shnong ha man la ki kot kiba kila soi.
U Bah Louis ula kynnoh ba u Chota Sangma ula dep ban ai da ki spah tylli ki NOC sha ki jaidbynriew Garo lajong ba kin kam trai ia ki jaka ki puta jong ka Hima bad ula die ruh iaki jaka sha ki jaidbynriew Manipuri, Nepali bad Punjabi.
U Nongialam ka HNYM ula ong, “Ka KHADC kadei ban pynduh pyndam noh iaka kyntien ‘Nongpyniaid Shnong’ ha ka Mylliem Act namar kam don jingmut eiei, namar ka Dorbar Shnong Khasi kadei ka riti bad ka synshar khaddar katkum ka riti ka dustur u Khasi bad kiwei ki jaidbynriew haba ki kam RangbahShnong kin ym sngewthuh eiei ruh em ia ka bor kaba la pynkup ha ki Rangbah Shnong Khasi ki jong ngi”.
U la ong, ka seng ka kwah ruh ba ka Hima Mylliem kadei ban shimti noh halade iaka jingsynshar ban pyniaid iaka kam shnong ha ki shnong kiba hap ha ka Them Raid Marwet namar ha kane ka Raid ki don haduh 28 tylli ki shnong kiba la shong bad synshar da ki jaidbynriew Garo.
