Shillong, Naiwieng 09 : U Vice Chancellor ka North Eastern Hills University (NEHU) Prof Prabha Shankar Shukla ha ka sngi Saitjain, ula kyrpad biang ia ki samla pule ba iakhih ba kin pynsangeh noh ia ki jingiakhih bad ban wan biang sha ka miej jingiakren.
Hynrei, ki samla pule ka NEHU kila kyntait ia kane ka jingkhot jong u Vice Chancellor ban iakren bad pynpaw ba ki long kiba kloi ban wan sha ka miej iakren tad hadien ba ula hiar shuki kum u khlieh jong kane ka skulbah.
Ka University kala don hapdeng ka jingkham dam hadien ka jingiakhih ki samla pule da kaba shah thngan, kaba la ialam da ka North Eastern Hill University Students’ Union (NEHUSU) bad kyrshan da ka Khasi Students Union (KSU – NEHU Unit), kiba dawa ban hiar shuki ia u VC bad ban weng kami a u Registrar bad u Deputy Registrar, kaba ki ong b aka jingthungkam ia ki ka long kaba be-ain.
Hynne ka sngi ruh kila don katto katne ngut ki samla pule kiba la poi sha hospital hadien ba ki shah tngan kaba la iaid la 90 kynta.
Ha ka kyrwoh, u Prof Shukla ula iai ban ia ka jinglong kloi jong u ban leh eiei halor ki jingeh jong ki samla pule, bad ong ba u la kut jingmut shisha ban leh eiei na ka bynta ka bha ka miat jong ki samla pule bad ka jingjam shakhmat jong ka skulbah.
Haba pynpaw ia ka jingsngewkhia ia ka koit ka khiah bad ka bha ka miat ki samla pule, u Prof Shukla ula pynpaw ia ka jing pyrshang jong u ban iakren bad ki (samla pule), haba ban jur ba um don eiei pyrshah ia u bad kwah tang ia ka jingjop jong ki bad ka roi ka par jong ki. “Nga don hangne ban pynbeit ia baroh ki jingeh bala pynpaw bad pynurlong ia ki jingdawa bala buh da ki samla pule ha ka lynti ka bym shah liang bad kaba shai” ula ong.
U Prof Shukla ula pyntip ba wat hapdeng ka jingpyrshang jong u ban iakren bad ki samla pule, ula shah set kut hala ka jong ka Iingsah bad shah pyrrkhing ban mih ne iaid hapoh ka campus.
Kum ka sienjam ba kongsan ban lah leh eiei halor ki jingeh jong ki samla pule, u Vice Chancellor ula tyrwa ban pynlong ia ka jingialang ba kyrkieh jong ka Executive Council (EC), kaba la buh ban pynlong hynnin ka sngi hynrei la hap pynsangeh noh namar ki jingshah pyrrkhing. Ula kyntu ia ki samla ban shah ia ka jingialang ka EC ba kan iaid shakhmat ha ka sngi Nyngkong ka 11 tarik Naiwieng, ka ban pynlah ia u ban shim ia ki sienjam ba donkam halor kine ki kam ba kongsan kynthup ia ka jingthung ia ki Pro Vice Chancellor bad ka jingthaw ia ka Inquiry Committee ban shong bishar thymmai halor ka jingthungkam ia u Registrar bad Deputy Registrar.
Haba iakren bad ki nongthoh khubor, u General Secretary ka NEHUSU samla Toniho Kharsati ula ong “Ngim don eiei shuh ban iakren bad u Vice Chancellor ka NEHU. Mynta, ka jingdawa ba hakhmat eh jong ngi ka long ba u VC u dei ban hiar shuki mardor”.
Ula ban jur ruh ia ka jingdonkam ban weng kam noh ia u Registrar bad Deputy Registrar namar ka jingkynnoh ba kim lah ban treikam.
Ula kam ba watla ki samla pule ka NEHU kila shong shah thngan la palat 90 kynta ha ka khyrdop jong ka Administrative Block, hynrei u VC um shym la long uba kloi ban wan bad kren lane kylla shaphang ka koit ka khiah bad ka bha ka miat jong kiba shah thngan.
“Namar kata, ka mat iakhih ba kongsan eh mynta ka dei ba u VC u dei ban hiar huki bad tang hadien ba leh ia kane, ngin sa long kiba kloi ban iakren ia ki jingdawa jong ngi. Ki samla pule kim don jingshaniah shuh ha une u VC. Kumta, ngi kwah ia u ban mih noh na NEHU” ong u samla Toniho.
“Tang hadien ka jinghiar shuki u VC bad mih na ka Universty, ngin sa wan sha ka miej jingiakren” ula bynrap.
 Prof Prabha Shankar Shukla ha ka sngi Saitjain, ula kyrpad biang ia ki samla pule ba iakhih ba kin pynsangeh noh ia ki jingiakhih bad ban wan biang sha ka miej jingiakren.){kind=link}